Elimizde tumaýǵa qarsy egý jumystary segiz óńirde 98 paıyzǵa aıaqtaldy - Sh. Jandosov

Bul týraly búgin Almatyda «Syrqattan saqtanýdyń tıimdi joly - vaktsına jasaý» degen taqyryppen ótken baspasóz máslıhatynda QR Densaýlyq saqtaý mınıstrligi Memlekettik Sanıtarlyq-epıdemıologııalyq qadaǵalaý komıtetiniń Sanıtarlyq-epıdemıologııalyq saraptama jáne monıtorıng ǵylymı-tájirıbelik ortalyǵynyń dırektory Shalǵynbaı Jandosov málim etti.

Onyń aıtýynsha, qazirgi tańda respýblıkamyzda 814 myńnan asa adam vaktsına alǵan. «Onyń 680 myńnan asa adamy jergilikti bıýdjet esebinen, jumys berýshiler esebinen 73 myń -nan asa adam, aqyly túrde 60 myńnyń ústinde adam vaktsına aldy. Úkimet tarapynan bul sharaǵa bıyl eki ese qarjy - 577 mln. 245 myń teńge bólinip, oǵan 784 131 vaktsına satyp alyndy. Vaktsına júrek aýrýymen, sozylmaly ókpe qabynýymen aýyratyn balalarǵa jáne 60 jastan asqan, dıspanserde esepte turǵan qarttarǵa jasaldy. Ótkir respıratorlyq vırýsty ınfektsııa men tumaý aýrýyn aldyn-alýǵa baǵyttalǵan aılyq shara jeltoqsannyń birine deıin ótedi»,-dedi ol.

Shalǵynbaı Jandosovtyń aıtýynsha, qazirgi ýaqytta ótkir respıratorlyq vırýsty ınfektsııa aýrý kórsetkishi 1,9 paıyzǵa tómendep otyr.

Onyń aıtýynsha, Jyl saıyn elimiz boıynsha 1 mln 200 myńǵa jýyq adam tumaý men ORVI-ge shaldyǵady. «Syrqatqa shaldyqqandardyń negizgi bóligin (70%) 14 jasqa tolmaǵan balalar quraıdy»,-dedi ol.

Baspasóz máslıhaty barysynda bunymen qatar,: «Búginde Qazaqstanda 14 jasqa deıingi balalar syrqattarynyń arasynda tynys joldary aýrýlarynyń úlesi 48,4% quraıdy. 5 jasqa deıingi balalar negizinen ótkir respıratorlyq vırýsty ınfektsııalar (ÓRVI, pnevmonııa) men ishek ınfektsııalarynyń kesirinen kóz jumyp otyr. Balalardyń ólimine kóbine ótkir respıratorlyq syrqattardyń asqynyp ketýinen bolatyn «pnevmonııa» tikeleı áser etýde»,- dep atap ótildi.