Elimizde týabitti kemtar bolyp dúnıege kelgen sábıler sany kúrt artty

ASTANA. QazAqparat – Bıyl Qazaqstanda 8 aıdyń qorytyndysy boıynsha kemtar bolyp dúnıege keletin nárestelerdiń sany artqan, dep habarlaıdy QazAqparat tilshisi.

«Bıyl 8 aıda 3015 bala týabitken damý kemistigimen ómirge keldi. Ótken jylmen salystyrǵanda ósý úrdisi baıqalady. 2021 jyldyń 8 aıy boıynsha bul kórsetkish 2594 quraıdy. Bizde qursaqtaǵy náreste kemistigin erte anyqtaý múmkindigi bar. Sondaı-aq, bıyl prenataldy skrınıngtiń jańa qaǵıdalary bekitilip, prenataldyq ýltradybystyq zertteý skrınıngin ótkizý standarty ázirlendi. Sonymen qatar atalǵan sala boıynsha 150 maman halyqaralyq standartqa saı biliktiligin arttyrdy», - degen jaýap berdi Densaýlyq saqtaý mınıstrligi QazAqparat joldaǵan resmı saýalǵa.

Odan bólek, atalǵan vedomstvo urpaq saýlyǵy máselesinde ata-analardyń jaýapkershiligi baryn eske saldy.

«Ár azamat densaýlyǵyn kútip, salaýatty ómir saltyn ustanyp, densaýlyqqa zııan keltiretin áreketterden aýlaq bolǵan jón. Aýrýdyń aldyn alýda durys tamaqtaný da mańyzdy. Sol sııaqty otbasyn qurý men ómirge urpaq ákelý protsesine erli-zaıyptylar erekshe mán berýi tıis. Ómirge saý urpaqty ákelý jaýapkershilikti talap etedi», - deıdi mınıstrlikten.

Buǵan deıin Densaýlyq saqtaý mınıstrligi sábı óliminiń kóbeıgenin rastaǵan edi.

Atap aıtqanda, bıyl 9 aıda ólim-jitim 8,18%-dy quraǵan. Ótken jyly atalǵan kórsetkish 7,92% bolǵan.