Elimizde trofeılik ańshylyqty damytý usynyldy

NUR-SULTAN. QazAqparat - QR Mádenıet jáne sport vıtse-mınıstri Órken Bısaqaev elimizde trofeılik ańshylyqty damytý boıynsha vedomstvonyń usynysyn jarııalady, dep habarlaıdy QazAqparat tilshisi.

«Shetel týrısi trofeılik ańshylyqqa erekshe qyzyǵýshylyq tanytady. Alaıda zańnamadaǵy keıbir problemalarǵa baılanysty trofeılik ańshylyq maqsatyndaǵy týrızmdi damytý qarqyn almaýda», - dedi Ó. Bısaqaev Parlament Májilisinde «Qazaqstannyń keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly» zań jobasyn tanystyra otyryp.

Onyń sózine qaraǵanda, álemdik tájirıbe jylyna týrıstik aǵyndy 30 paıyzǵa deıin arttyrý múmkindigi trofeılik ańshylyqqa keletinder esebinen bolatynyn kórsetip otyr.

«Osyǵan baılanysty trofeılik ańshylyqty damytýdyń mańyzdy sharalarynyń biri - fermerlik ańshylyq sharýashylyǵy salasynda kásipkerlikti qoldaý», - dedi vıtse-mınıstr.