Elimizde tótenshe jaǵdaı rejımin buzǵan 64 adam qamaýǵa alyndy

NUR-SULTAN. QazAqparat - Elimizde tótenshe jaǵdaı rejımin buzǵan 64 adam qamaýǵa alyndy. Bul týraly «Habar 24» telearnasynyń tikeleı efırinen QR Aqparat jáne qoǵamdyq damý mınıstri Dáýren Abaev aıtty, dep habarlaıdy QazAqparat tilshisi.

«Birden aıtaıyn, azamattarymyzdyń basym bóligi tótenshe jaǵdaı rejımi talaptaryna túsinistikpen qaraıdy. Degenmen, barlyǵy birdeı olaı oılamaıdy. Negizinen zańbuzýshylyqtar Ákimshilik quqyq buzý týraly kodekstiń 476-baby boıynsha oryn alýda. Jaýapkershilik sharasy - 10 AEK-ke deıin aıyppul nemese 15 táýlikke qamaý», - dedi mınıstr.

Onyń aıtýynsha, ókinishke qaraı, shekteýlerge qaramastan barlyq óńirde toılar men jıyndar, saltanatty sharalar ótip jatyr. Kafeler men ınternet-klýbtar, balalarǵa arnalǵan úıirmeler jumys istep tur.

«Osyndaı 313 derek anyqtaldy. 94 adam jaýapqa tartylyp, onyń 64-i qamaýǵa alyndy», - dedi Dáýren Abaev.