Elimizde tolyq emes otbasylardyń jáne nekesiz týǵan balalardyń úles salmaǵy ósip keledi
ASTANA. 22 qarasha. QazAqparat /Marlan Jıembaı/ - Elimizde tolyq emes otbasylardyń jáne nekesiz týǵan balalardyń úles salmaǵy ósip keledi. Bul týraly búgin elordada ótken «Otbasy jáne qoǵam: dástúrler, qundylyqtar jáne damý keleshegi» atty halyqaralyq konferentsııa barysynda QR Eńbek jáne halyqty áleýmettik qorǵaý mınıstri Gúlshara Ábdiqalyqova málim etti.
«Elimizde erkekterge qaraǵanda áıelderdiń sany artyp keledi. Erkekterdiń arasynda ólim sany kóbeıýine baılanysty, genderlik turǵydan tepe-teńdik buzylyp otyr. Mysaly, búgingi 30 jastaǵy 10 erkektiń tórteýi 60 jasqa deıin ómir súrmeıdi», - dep atap ótken mınıstrdiń paıymynsha, sonyń nátıjesinde jesirler men ákesiz qalǵan balalar sany artyp otyr. Bul otbasynda tabys kirisin jetkiliksiz etýmen qatar, onyń músheleriniń bilim alý múmkindigin shekteıdi.
G.Ábdiqalyqovanyń aıtýyna qaraǵanda, halyq arasynda ólim deńgeıi de joǵarylap tur. Oǵan - júrek -qan tamyrlary aýrýlary, jaraqat alý men ýlaný, tynys organdarynyń aýrýy, isik aýrýlary jáne juqpaly ınfektsııalyq aýrýlar sebep bolýda.
Sondaı-aq halyqtyń densaýlyǵyna qazirgi ekologııalyq jaǵdaıdyń zardaby da óz áserin tıgizip otyrǵandyǵyn aıtqan ol: «Tolyq emes otbasylar men nekesiz týǵan balalardyń úles salmaǵy artyp keledi. Óıtkeni azamattardyń, ásirese jastardyń eleýli bóligi sheteldiń bizge jat ádetteri boıynsha resmı nekesiz turyp jatyr», - dedi.
