Elimizde tiri jetimderdiń sany tul jetimdermen birdeı bolyp otyr
ASTANA. Aqpannyń 25-i. QazAqparat /Qanat Mámetqazyuly/ - Elimizde ata-anasy bar tiri jetimderdiń sany tul jetimdermen birdeı bolyp otyr. Búgin QR Parlamenti Senatynyń jalpy otyrysynda «Balalardy qorǵaý jáne balany sheteldik asyrap alýǵa qatysty yntymaqtastyq týraly konventsııany ratıfıkatsııalaý týraly» zańdy talqylaý barysynda Bilim jáne ǵylym mınıstri Janseıit Túımebaev osylaı málim etti,
dep habarlaıdy QazAqparat.
«Jalpy halyqaralyq úrdis boıynsha damyǵan memleketterde múmkindiginshe jetimder úıi bolmaıdy. Kóptegen damyǵan elderde jetim balalardy otbasylarǵa asyrap alýǵa jaǵdaı jasalady. Ókinishke qaraı, Qazaqstanda jetim balalardyń sany 42 myńnan astam. Bunyń 15 myńnan astamy balalar úıinde tárbıelenýde. Qalǵany qorǵanshylyq, patronattyq, qamqorshylyq tárbıege berilgen. Sonymen birge, elimizde tiri jetimderdiń sany tul jetimdermen birdeı bolyp otyr. Sol úshin jetimderge qatysty Úkimet tarapynan góri qoǵam tarapynan belsendi sharalar atqarylsa ıgi», dedi mınıstr.
Onyń aıtýynsha, osy ýaqytqa deıin sheteldik azamattar asyrap alǵan balalardyń 80 paıyzdan astamy belgili bir dárejedegi naýqastar, densaýlyǵynda kemshiligi bar sábıler bolyp otyr. Atap aıtqanda, sheteldikter asyrap alǵan balalardyń 254-i olegafrenııamen, 326 bala jynystyq aýrýlar boıynsha, 11 bala -AQTQ aýrýlarynyń qatarynda bolyp otyr. Budan bólek, 7 myń 293 bala júrek, júıke aýrýyna shaldyqqandar. Sonyń ishinde 253 bala, ıaǵnı sheteldikke asyrap alýǵa berilgenderdiń 3 paıyzy ǵana densaýlyǵy jaqsy, damýy durys sábıler bolyp otyr. «Bundaı balalardy asyrap alǵannan keıingi tekserýler barysynda olardyń 50 paıyzdan astamynyń densaýlyǵy táýir bolǵan. Aldaǵy ýaqytta da biz múmkindiginshe osyndaı aýyr naýqasty balalardy berýdi nazarda ustaıtyn bolamyz», dedi mınıstr.
