Elimizde termınal oıyndary men lotereıaǵa tyıym salý usynyldy
ASTANA. QazAqparat – Májilis depýtaty Janarbek Áshimjan elimizdegi qumar oıyndar jáne bás tigý máselesin erekshe nazarǵa alyp, qatań sharalar qabyldaýdy usyndy, dep habarlaıdy QazAqparat tilshisi.
«Kazınolardy qaqsap júrip Qapshaǵaıǵa, shýlap júrip Şýchınskige kóshirgenmen, másele óz sheshimin tolyq tappady. Órimdeı jastardy túrli onlaın ınternet-kazınolar men termınaldarǵa telmirtip qoıdy. Nátıjesinde, qumar oıynǵa shatylǵandar adam aıtsa sengisiz aýyr qylmystarǵa baryp, qatigezdik beleń alyp barady», - dedi Janarbek Áshimjan Májilistiń jalpy otyrysynda Premer-Mınıstrdiń orynbasary Altaı Kólginovke saýal joldaı otyryp.
Onyń aıtýynsha, qumar oıynǵa áýesterdiń kazıno men býkmekerlik kompanııalarǵa jumsaıtyn qarajat kólemi jaǵa ustatady.
«Ótken jyly qumar oıyndardy uıymdastyrý jáne bás tigý boıynsha qyzmetter kólemi 553,6 mlrd teńgeni quraǵan. Bul 2021 jylmen salystyrǵanda 52 mlrd teńgege, al 2020 jylmen salystyrǵanda 6,2 esege (89,7 mlrd teńge) artqan. Qumar oıyndardy uıymdastyrý jáne bás tigý – qyzmet kórsetý kólemi boıynsha jyljymaıtyn múlikti rásimdeýden, (2,6 ese), sáýlet, ınjenerlik izdenister, tehnıkalyq synaqtar jáne taldaý salasyndaǵy qyzmetten (1,7 ese), kompıýterlik baǵdarlamalaý men konsýltatsııalyq qyzmetterden (1,4 ese) keıingi orynda tur», - deıdi ol.
Halyq qalaýlysy sózin qorytyndylaı kele atalǵan máseleni sheshý boıynsha kelesi usynystardy bildirdi:
Birinshi, býkmekerlik keńselerge bankrot dep tanylǵan tulǵalardan jáne qoldanystaǵy nesıe boıynsha 3 aıdan astam ýaqyttan beri tólem jasaı almaǵan tulǵalardan onlaın jáne oflaın bás tigýdi qabyldaýǵa qatań tyıym salý kerek.
Ekinshi, qarjy pıramıdalaryn, onlaın-kazınolardy jáne basqa da qaýipti qumar oıyndardy jarnamalaýǵa tolyq tyıym salý týraly qoldanystaǵy zańnamaǵa tıisti ózgerister engizý kerek.
Úshinshi, elde tyıym salynǵan, biraq soǵan qaramastan ınternette kezdesetin elektrondyq kazınolardyń jarnamalyq qyzmetin baqylaýdy kúsheıtý qajet.
Tórtinshi, sýpermarketter men qoǵamdyq oryndarda samsap turǵan «Lotomatic» sekildi ártúrli lotereıa termınaldaryn ornatýǵa jáne lotereıa bıletterin taratýǵa qatań tyıym salý kerek.
Besinshi, jetekshi tele-radıo arnalar men ınternet-portaldarda qumar oıyndy nasıhattaıtyn jarnamanyń barlyǵyna syıym salý kerek.
