Elimizde temirjolmen júk tasymaldaý kólemi artyp keledi

ASTANA. QazAqparat – 2022 jyly «Qazaqstan temir joly» kompanııasynyń temirjolmen júk tasymaldaý kólemi 14 paıyzǵa artty. Bul týraly «Samuryq-Qazyna» qorynyń ekonomıka jáne qarjy jónindegi dırektory Nazıra Nurbaeva málim etti, dep habarlaıdy QazAqparat tilshisi.

«Qazaqstan temir joly» kompanııasynyń ótken jylǵy júk aınalymyna qatysty kórsetkishi 245 mln tonna shaqyrym boldy. Bul - 2021 jylǵy kórsetkishten 5 paıyzǵa kóp. Onyń ishinde eksport 10,3 paıyzǵa artty. Tranzıttik júk kólemi 14 paıyzǵa ulǵaıdy», - dedi ol qorda ótken baspasóz máslıhatynda.

Onyń atap ótýinshe, Air Astana men Qazaq Air áýe kompanııalarynyń jolaýshylar tasymaldaýdaǵy jıyntyq kólemi - 7,9 mln jolaýshy. Ol - 2021 jylǵy kórsetkishten 10 paıyzǵa joǵary.

«Qazposhta» pandemııadan keıingi qaıtadan qalpyna kelý satysynda tur. Qytaı naryǵy bıyl ǵana ashyldy jáne poshta qyzmetteri kóleminiń aıtarlyqtaı, shamamen 9 paıyzǵa tómendeýi baıqalady. Halyqaralyq jóneltilimder, halyqaralyq sálemdemeler tarıfin arttyrý jumysy júrgizilgendigin atap ótken oryndy. Nátıjesinde bul baǵyttaǵy kiris 2021 jyldyń qorytyndysynda 45 paıyzǵa kóbeıdi», - dedi Nazıra Nurbaeva.