Elimizde temekige salynatyn salyq óte az, sonyń saldarynan temekini tutynýshylar sany artyp otyr - Májilis depýtaty
ASTANA. Mamyrdyń 13-i. QazAqparat /Aıdar Ospanalıev/ - Qazaqstandaǵy temeki ónimderine salynatyn salyqtardyń tómendigi balalar men jasóspirimder arasyndaǵy shylymqorlar sanynyń artýyna yqpal etip otyr. Bul týraly búgin Parlament Májilisinde «Qazaqstan zańnamasyn Dúnıejúzilik densaýlyq saqtaý
uıymynyń temekige qarsy kúres jónindegi negizdemelik konventsııasyna úılestirý» atty taqyrypta ótken dóńgelek ústel otyrysynda Májilis depýtaty Gúlnár Seıitmaǵambetova málim etti, dep habarlaıdy QazAqparat.
Onyń derekterinshe, temeki ónimderine salynatyn salyq kólemi eldegi barlyq salyqtardyń 28 paıyzyn quraıdy. Al temeki ónimderine beriletin aktsızdiń baǵasy nebári 11 paıyz. «Sonyń saldarynan temeki ónimderi jalpyǵa birdeı qoljetimdi. Osyǵan deıin elimizde temeki ónimderin nebári 40-50 teńgege satyp alýǵa bolatyn edi. Sońǵy ret atalmysh ónimderdiń birqatarynyń baǵasy kóterildi. Biraq bul múldem az. Temeki baǵasynyń nebári 20 paıyzǵa kóterilýi memleketke emes, kerisinshe temeki óndiretin kompanııalarǵa tıimdi bolyp otyr», dedi depýtat.
Onyń sózinshe, Eýropadaǵy qaýipsizdik jáne yntymaqtastyq uıymyna múshe elderde temekige salynatyn salyq 55 paıyzdan kem emes. Búkilálemdik densaýlyq saqtaý uıymynyń málimetteri boıynsha, temeki ónimderine salynatyn aktsızderdiń deńgeıi boıynsha Qazaqstan TMD memleketteri arasynda 10-shy orynda tur. Al jalpylaı salynatyn salyq boıynsha 12-shi orynǵa taban tireıdi.
