Elimizde tek bir nysan múgedekter úshin tolyq beıimdelgen - Jaqypova
ASTANA. QazAqparat - Qazaqstanda 28 myń áleýmettik jáne kóliktik ınfraqurylym nysandarynyń ishinde tek bireýi ǵana múmkindigi shekteýli jandardyń barlyq toptaryna beıimdelip jasalǵan.
Bul týraly búgin baspasóz máslıhatynda QR Eńbek jáne halyqty áleýmettik qorǵaý vıtse-mınıstri Svetlana Jaqypova málim etti, dep habarlaıdy QazAqparat.
«Búginde bizdiń monıtorıngtiń nátıjesi boıynsha Pavlodar oblysynda bir nysan qoljetimdi. Elimiz boıynsha tek bir ǵana nysan barlyq sanattarǵa qolaıly etip jasaldy»,-dedi Jaqypova.
Aıta keteıik, beıimdeýge jatatyn nysandardyń jalpy kóleminen 90 paıyzdan astamy Aqmola, Almaty, Shyǵys Qazaqstan jáne Pavlodar oblystarynda múgedek jandar úshin qolaıly qalypqa keltirilgen. Sondaı-aq beıimdeýdiń tómen deńgeıi Mańǵystaý oblysynda (347 nysannan 97), Qaraǵandy oblysynda (785 nysannan 302), Batys Qazaqstan oblysynda (955 nysannan 467), Soltústik Qazaqstan oblysynda (1735 nysannan 876), Aqtóbe oblysynda (702 nysannan 295), Qostanaı oblysynda (1 myń 166 nysannan 593), Jambyl oblysynda (904 nysannan 598), Astana qalasynda (309 nysannan 132) nazarǵa ilikken.
Osy oraıda vıtse-mınıstr qyzmet ıeleriniń nemese kásipkerlikpen aınalysatyn zańdy jáne jeke tulǵalardyń múgedekterdiń áleýmettik jáne kólik ınfraqurylymy nysandaryna kedergisiz ótýin qamtamasyz etpeýi aıyppul túrindegi ákimshilik jaýapkershilikke ákelip soqtyratynyn atap ótti.
Mınıstrlik málimetinshe, múgedekterdiń áleýmettik jáne kólik ınfraqurylymy nysandaryna kedergisiz ótýin qamtamasyz etý aıasynda,2012 jyldan bastap jyl saıyn olardy beıimdeýdiń óńirlik josparlary jasalýda. Qazaqstanda múmkindigi shekteýli jandar jıi baratyn 36 myń 200 nysan bar. Jergilikti atqarýshy organdar múmkindigi shekteýli jandarǵa qoljetimdiligi jóninde 28 myń 205 nysandy tólqujattandyrýdan ótkizýdi kózdegen edi. Ótken jyldyń qorytyndysynda 27 myń 828 nysan (98,7%) tólqujat alsa, onyń 17 myń 506 nysany (62,9%) beıimdelýge tıesili boldy. Bulardyń 11 myń 212 nysany (64%) qajet deńgeıde ıkemdeldi. Múgedekterge qoljetimdilik qamtamasyz etilgen áleýmettik jáne kólik ınfraqurylymy nysandarynyń úlesi tólqujatqa ıe bolǵan jalpy nysandar qatarynan 77,4 paıyzdy qurady.
