Elimizde tegin taekvondo mektepteri ashylady
ASTANA. QazAqparat - Qazaqstanda taekvondony damytý jáne balalar sportyn qoldaý maqsatynda Taekvondo federatsııasy balalarǵa arnalǵan tegin alty sport klýbyn ashady, dep habarlady Vesti.kz.
Federatsııa jańa klýbtaryn sporttyq jabdyqtarmen, qajetti mamandarmen jáne sport dárigerlerimen qamtamasyz etpek. Mundaı klýbtardyń biri Astanada ashyldy. Ol qazaq-túrik taekvondo mektebin ashqan Mustafa Óztúriktiń qurmetine «Mustafa - Astana» degen ataýǵa ıe boldy. Ashylý saltanaty aıasynda mektep oqýshylaryna barlyq qajetti jabdyqtar men sporttyq kıimder tabys etildi.
«Alty aımaqtyq balalar sport klýbynyń ashylý baǵdarlamasynyń bastalǵanyn zor qýanyshpen jetkizgimiz keledi. Onda bolashaqta el namysyn qorǵaıtyn sportshylar - daryndy balalar tálim almaq. Materıaldyq qıyndyqtar talantty sportshylardy tárbıeleý isinde kedergi týdyrmas úshin, biz barlyq shyǵyndardy óteýdi óz moınymyzǵa aldyq», - degen edi Astanadaǵy mekteptiń ashylý saltanatynda QR Taekvondo federatsııasynyń prezıdenti Vıacheslav Kım.
Aıta keteıik, «Mustafa-Astana» klýby «Saryarqa» velotreginiń ǵımaratynda 500 sharshy metr aýmaqty alyp jatyr. Jaqyn arada elimizdiń shyǵys, ońtústik, batys jáne soltústik óńirlerinde taǵy bes klýb ashý kózdelgen. Olarda sportqa degen qulshynysy zor qazaqstandyq órenderdiń súıikti sport túrimen shuǵyldanýyna barlyq jaǵdaı jasalady.
