Elimizde taýyq jumyrtqasyn óndirý kólemi 11,6 paıyzǵa ósti
NUR-SULTAN. QazAqparat – Jyl basynan beri eldegi aýyl sharýashylyǵy, ósimdik jáne tamaq ónimderiniń kólemi artty. Bul týraly QR Aýyl sharýashylyǵy mınıstri Erbol Qarashókeev aıtty, dep habarlaıdy QazAqparat.
«Bıylǵy 3 aıda jalpy aýyl sharýashylyǵy óniminiń kólemi 1,8%-ǵa ulǵaıyp, 700,3 mlrd teńgeni qurady. Bul ósim negizinen mal sharýashylyǵy ónimin óndirý kóleminiń 2% ulǵaıýy arqyly qamtamasyz etildi. Atap aıtsaq, et óndirý kólemi tirideı salmaqta 1,2%-ǵa, sút óndirý kólemi 1,3%-ǵa, taýyq jumyrtqasyn óndirý kólemi 11,6%-ǵa ósti», - dedi Erbol Qarashókeev Úkimettiń búgingi otyrysynda.
Bul rette 42,8 mlrd teńgege ósimdik sharýashylyǵy ónimderi óndirilip, naqty kólem ındeksi 100% quraǵan.
Bul kórsetkish aýyl sharýashylyǵy daqyldaryn jabyq topyraqta, ıaǵnı jylyjaıda ósirý esebinen múmkin boldy.
Jalpy aýyl sharýashylyǵy ónimderiniń respýblıkalyq deńgeıden joǵary ósim qarqyny 6 oblysta baıqaldy.
Olar – Mańǵystaý, Soltústik Qazaqstan, Shyǵys Qazaqstan, Qaraǵandy, Almaty jáne Aqmola oblystary.
«Kórsetilgen kezeńde tamaq ónimderin óndirý kólemi 3,8%-ǵa ósip, 607,8 mlrd teńgeni qurady. Bul rette óńdelgen jáne konservilengen kókónis óndirý kóleminiń 1,8 ese, unnyń 23%-ǵa, jańa aýlanǵan, salqyndatylǵan nemese muzdatylǵan balyqtyń 21,5%-ǵa, jarmanyń 8,3%-ǵa, shujyq ónimderiniń 7,8%-ǵa, makaronnyń 5,3%-ǵa, qyshqyl sút ónimderiniń 2,6%-ǵa artqany baıqaldy. Tamaq ónimderi óndirisiniń negizgi kapıtalyna salynǵan ınvestıtsııa kólemi 35,8%-ǵa ulǵaıyp, 34,1 mlrd teńgeni qurady. Jalpy Aýyl sharýashylyǵy mınıstrligi josparlanǵan nátıjelerge qol jetkizýge múmkindik beretin barlyq qajetti sharalardy qabyldaýda», - dedi Aýyl sharýashylyǵy mınıstri.
