Elimizde taýyq eti 28 paıyzǵa qymbattady

ASTANA. QazAqparat – Qazaqstanda jyl basynan beri taýyq etiniń baǵasy 28 paıyzǵa, al taýyq aıaqtarynyń quny 27 paıyzǵa qymbattaǵan, dep habarlaıdy QazAqparat Energyprom resýrsyna silteme jasap.

«Bıyl qańtar-qazan aralyǵynda Qazaqstanda 93,3 myń tonna jańa nemese salqyndatylǵan qus eti óndirildi. Bul ótken jylmen salystyrǵanda 3,5%-ǵa artyq. Al muzdatylǵan qus etiniń óndirisi 109,3 myń tonnany quraıdy. Ótken jylmen salystyrsaq 1,7% joǵary», - delingen Energyprom dereginde.

Atalǵan resýrstyń málimetine sáıkes, óńirler arasynda muzdatylǵan qus etin óndirý boıynsha Almaty oblysy kósh bastap tur.

ıAǵnı, 54,6 myń tonna nemese 4,9%. Kóshbasshylar úshtigine Aqmola jáne Abaı oblysy kiredi

Sondaı-aq, salqyndatylǵan qus etin óndirý boıynsha Aqmola oblysy (35,2 myń tonna) aldyńǵy orynda. Ekinshi orynda ShQO, al úshinshi orynǵa Almaty oblysy jaıǵasqan.

Ótken jyly elimizde 112,5 myń tonna salqyndatylǵan jáne 127 myń tonna muzdatylǵan qus eti óndirildi. Demek salqyndatylǵan qus eti 20,5 paıyzǵa, al muzdatylǵan qus eti 13,8 paıyzǵa artyq.

Bıyl qańtar-tamyz aıynyń qorytyndysy boıynsha jergilikti kompanııalar qus eti men azyq-túlik ónimderine suranysty (ishki naryqpen eksportty qosa sanaǵanda) 67,2%-ǵa qamtamasyz etti. 2021 jyly 69,2%-ǵa qamtyǵan edi.

Import úlesi 30,8%-dy qurady. Qazaqstan 84,9 myń tonna «aq» et jáne sýbónimder ákeldi. Bul ótken jylmen salystyrǵanda 6%-ǵa az.

Al eksportqa 8,7 myń tonna et jiberildi, kórsetkish 55,6%-ǵa az. Іshki naryqta qus eti jáne qus eti ónimderin satý 4,3%-ǵa ıaǵnı 267,2 myń tonnaǵa deıin ósti.

2022 jylǵy qazan aıynyń qorytyndysy boıynsha Qazaqstanda taýyq eti 27,9%-ǵa, al taýyq aıaqtary (okorochka) 26,7%-ǵa qymbattady. Osylaısha dúkender men bazar sóresinde taýyq etiniń kelisi 1,4 myń teńge, al taýyq aıaqtarynyń kelisi 1,2 myń teńge boldy.

Taýyq eti baǵasynyń qymbattaýy ásirese Abaı oblysynda baıqaldy. Bir jylda 52,3%-ǵa ósken.

Sonymen qatar Shymkent qalasynda 48,7%-ǵa jáne ShQO-da 41,9%-ǵa qymbattaǵan.

Kerisinshe arzan baǵa Almaty oblysynda tirkeldi. Atalǵan óńirde ósim - 12,3%.

Taýyq aıaqtarynyń (okorochka) baǵasy Mańǵystaý oblysynda 54,9%, Pavlodar oblysynda 43,9%-ǵa jáne SQO-da 35,7%-ǵa qymbattaý baıqaldy.

Elimizdiń iri qalalarynyń ishinde taýyq eti Aqtaýda (kelisi 1,7 myń teńge), taýyqtyń aıaqtary Túrkistanda kelisi 1,4 myń teńgege qymbat.

Eń arzan taýyq eti men taýyq aıaqtary Oral qalasynda, kelisi 997 teńge turady.