Elimizde tartylǵan sheteldik jumyskerlerdiń negizgi úlesin Qytaı men Túrkııa elderi qurap otyr
ASTANA. QazAqparat - Sheteldik jumys kúshin tartýdyń aǵymdaǵy jaǵdaıyna sáıkes, elimizde 31,9 myńǵa tarta ruqsattar qoldanylyp otyr. Búgin Májiliste «QR keıbir zańnamalyq aktilerine halyqtyń kóshi-qoni jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn tanystyrǵan Densaýlyq saqtaý jáne áleýmettik damý vıtse-mınıstri Dáýlet Arǵyndyqov osylaı málim etti.
Vıtse-mınıstrdiń aıtýynsha, qazirgi tańda Memleket basshysynyń tapsyrmasyna sáıkes, kompanııalarda sanattarǵa oraı qazaqstandyq kadrlarmen qamtylýdyń eń tómengi kórsetkishteri bekitilgen. «Búgingi kúni kompanııalarda birinshi basshylar men olardyń orynbasarlary, qurylymdyq bólimsheler basshylary boıynsha 70 paıyzǵa deıin jergilikti kadrlardan jasaqtalýy shart. Al bilikti joǵary bilimdi kadrlar men mamandarǵa kelsek, olardaǵy qazaqstandyqtardyń qamtylýy 90 paıyz bolýy tıis. Búgingi kúngi jaǵdaıǵa kelsek, elimizdiń aýmaǵynda sheteldik jumys kúshin tartýǵa 31,9 myńnan astam ruqsattar berilgen. Olardyń basym bóligin úshinshi sanattaǵy sheteldik jumysshylar, ıaǵnı tıisti bilimi bar mamandar quraıdy, al bilikti jumysshylar sany 30 paıyzdan asady. Budan keıingi oryndarda qurylymdyq bólimsheler basshylary -20,5 paıyz jáne birinshi basshylar men olardyń orynbasarlary -6,5 paıyz», - dedi vıtse-mınıstr.
Onyń aıtýynsha, respýblıkamyzda tartylǵan sheteldik jumyskerlerdiń negizgi úlesin Qytaı men Túrkııa elderi qurap otyr. Atap aıtqanda, barlyq tartylǵan sheteldik jumys kúshiniń 31 paıyzy Qytaıǵa, 14 paıyzy Túrkııaǵa tıesili. «Eger sala boıynsha jiktesek, olardyń basym bóligi qurylys salasynda (jalpy sheteldik jumys kúshiniń 60 paıyzy), sodan keıingi oryndarda taý-ken óndirisi (13,4 paıyz) jáne óńdeýshi ónerkásip (5,4 paıyz) salasynda jumys isteýde», - deıdi D. Arǵyndyqov.
