Elimizde taǵy 3 jańa arnaıy ekonomıkalyq aımaq qurylmaq - Úkimet otyrysy
TANA. 22 tamyz. QazAqparat /Rýslan Ǵabbasov/ - Elimizde taǵy 3 jańa arnaıy ekonomıkalyq aımaq qurý máselesi qarastyrylyp jatyr.
Bul týraly búgin selektorlyq rejımdegi Úkimet otyrysynda Úkimet basshysynyń orynbasary - ındýstrııa jáne jańa tehnologııalar mınıstri Áset Isekeshev málim etti.
«Búginde Úkimette 3 jańa arnaıy ekonomıkalyq aımaq qurý máselesi qarastyrylýda. Atap aıtqanda olar «Qorǵas - Shyǵys qaqpasy» arnaıy ekonomıkalyq aımaǵy, Pavlodar oblysyndaǵy «Munaı-hımııa ónerkásibi» arnaıy ekonomıkalyq aımaǵy, sondaı-aq Qaraǵandy oblysyndaǵy «Saryarqa» arnaıy ekonomıkalyq aımaqtary. Qazirgi kezde qujattar boıynsha jumystar atqarylyp jatyr», - dep atap ótti vıtse-premer.
Munymen qosa Á. Isekeshev arnaıy ekonomıkalyq aımaqtar jónindegi zań ázirlenip jatqandyǵyna jáne qujat olardyń jumysynyń tıimdiligi boıynsha tıisti baǵyttardy qamtıtynyn jetkizdi. «Zań jobasy bar. Endi 1 qazanǵa deıin barlyq normatıvtik-quqyqtyq aktilerdi daıarlaý boıynsha jumystardy aıaqtaýdy josparlap otyrmyz.
Sondaı-aq jyl sońyna deıin bul turǵyda jańa qadamdar boıynsha jumys isteý úshin qazirgi kezde bar 6 arnaıy ekonomıkalyq aımaqtardy qaıta qosý boıynsha jumystardy támamdaýdy josparlaýdamyz», - dedi ol.
Vıtse-premerdiń paıymdaýynsha, bul sharalar ınvestıtsııa tartý turǵysyndaǵy kórsetkishterdiń artýyn aıtarlyq ózgertpek.
