Elimizde tabysy tómen adamdardy yntalandyrýdyń tetigi iske asyrylady
Ataýly áleýmettik kómek jańa úlgide shartsyz jáne shartty aqshalaı kómek bolyp 2 túrge bólinedi.
Shartsyz aqshalaı kómek quramynda eńbekke jaramsyz músheleri bar otbasylaryna (máselen, qart zeınetkerler men múgedekter otbasy) nemese eńbekke jaramdy músheleri eńbekpen qamtý sharalaryna obektıvti sebeptermen qatysa almaıtyn otbasylaryna (mysaly, mektep jasyndaǵy balalary bar jalǵyzbasty ana) beriledi. Mundaı otbasylarynan járdemaqy alýy úshin jumyspen qamtý sharalaryna mindetti túrde qatysý talap etilmeıdi.
Shartty aqshalaı kómek quramynda eńbekke jaramdy kem degende bir múshesi bar otbasyna áleýmettik kelisimshart jasasqan jaǵdaıda, sonymen qatar, otbasynyń barlyq eńbekke jaramdy músheleri jumyspen qamtý sharalaryna mindetti túrde qatysqan jaǵdaıda beriledi. Bundaı kómekke eń tómengi kúnkóris deńgeıiniń jartysynan tabysy tómen otbasylar júgine alady.
Áleýmettik kelisimshartqa qol qoıa otyryp, taraptar ózara jaýapkershilikti moıyndaryna alady: áleýmettik qyzmetter jumyspen qamtý sharalaryn qarastyryp, járdemaqy tólese, otbasynyń eńbekke jaramdy músheleri jumyspen qamtý sharalaryna adal nıetpen qatysady.
QR Densaýlyq saqtaý jáne áleýmettik damý vıtse-mınıstri Svetlana Jaqypovanyń aıtýynsha, bul jańa áleýmettik kómek qazirgi qoldanystaǵy járdemaqyny almastyrady. Onyń ishinde kópbalaly otbasylaryna arnaıy memlekettik járdemaqyny, az qamtylǵan otbasylaryna arnalǵan 18 jasqa deıingi memlekettik balalar járdeamaqysyn, az qamtylǵan úı sharýashylyǵyna beriletin ataýly áleýmettik kómekti aýystyrady. Ázirge osy úsh tólem júzege asyrylady. Alaıda 2018 jyldyń 1 qańtarynan bastap bir tólemge ózgeredi.
Sonymen qatar adamdarǵa tekten tek aqshalaı kómek usynylmaıdy, oǵan jumysqa ornalasýǵa kómek beriledi, qaıta daıarlaý men kásibı biliktiligin arttyrý úshin ártúrli kýrstarǵa jiberiledi. Osylaısha, otbasynyń kedeılik jaǵdaıynan shyǵý múmkindigi yntalandyrylady. Atap aıtqanda, otbasynyń eńbekke jaramdy músheleri óziniń eńbekaqasynan bólek, jańa ataýly áleýmettik tólemderdi alady. Bul shamamen otbasynyń árbir múshesine 13 myń teńgeden (óńirler arasynda aıyrmashylyq bar) tıesili bolady. Olar bul kómekti aı saıyn nemese birden úsh aıǵa alýǵa quqyly. Tólemder bir jyldan keıin toqtaıdy, ıaǵnı otbasynyń jaǵdaıy jaqsarǵannan keıin doǵarylady.
2016 jyly joba elimizdiń barlyq óńirlerinde iske asyrylýda. Bul maqsatqa respýblıkalyq bıýdjetten aǵymdaǵy jylǵa 1,4 mlrd. teńge qarastyrylǵan. Jergilikti atqarýshy organdardyń málimetine sáıkes, 2016 jylǵy 1 mamyrdaǵy jaǵdaı boıynsha «Órleý» jobasysynyń aıasynda kórsetiletin shartty aqshalaı kómek jalpy somasy 163,2 mln.teńge kóleminde 12,4 myń adamǵa taǵaıyndaldy. Jumyspen qamtýǵa járdemdesýdiń belsendi sharalaryna 2,8 myń adam nemese «Órleý» jobasynyń eńbekke qabiletti qatysýshylarynyń jalpy sanynan 87,6 % shaqyryldy.