Elimizde tabysy kúnkóris deńgeıinen tómen adamdar sany 508,9 myń adamdy qurap otyr
ASTANA. QazAqparat - Úı sharýashylyqtaryn zertteý derekteri boıynsha Qazaqstan Respýblıkasynda tabysy kúnkóristiń eń tómengi deńgeıiniń shamasynan tómen halyqtyń úlesi 2014 jyldyń 1 toqsanynda 3,0 paıyzdy nemese 508,9 myń adamdy qurady. Bul ótken jylǵy tıisti kezeńnen 0,1 paıyzǵa tómen.
Sonymen qatar tabysy kúnkóristiń eń tómengi deńgeıiniń shamasynan tómen aýyldyq jerdegi halyqtyń úlesi tabysy kúnkóris deńgeıinen tómen qalalyq jerdegi halyqtyń úlesinen 3,8 esege artyp, 5 paıyzdy nemese 385,6 myń adamdy qurap otyr. Bul týraly QR Statıstıka agenttiginiń baspasóz qyzmetinen habarlady. Agenttik málimetine qaraǵanda, 2014 jyldyń 1 toqsanynda tabysy kúnkóristiń eń tómengi deńgeıiniń shamasynan tómen halyqtyń basym úlesi Ońtústik Qazaqstan (5,4 paıyz), Jambyl (4 paıyz), Qyzylorda (3,9 paıyz), Atyraý (3,8 paıyz) oblystaryna tıesili. Al ondaı sanattar eń az qonystanǵan óńir Astana (0,5 paıyz) jáne Almaty (0,7 paıyz) qalalarynda baıqalǵan. «Úı sharýashylyqtarynyń aqshalaı shyǵystary olardyń materıaldyq qamtamasyz etilýine tikeleı baılanysty. Halyqtyń shyǵystary men tutynýy detsıldik bólý kezinde tabystar sııaqty aıtarlyqtaı saralanýdy kórsetedi. Mysaly, 2014 jyldyń 1 toqsanynda 10 paıyz eń az jáne 10 paıyz eń kóp qamtamasyz etilgen halyqtyń azyq-túlik taýarlaryna jumsaǵan shyǵystary arasyndaǵy aıyrmashylyq 4,1 eseni, azyq-túlik emes taýarlarǵa - 7,2 eseni, al aqyly qyzmetterge - 8 eseni qurady», - delingen baspasóz baıanynda.
