Elimizde tabysy kúnkóris deńgeıinen tómen adamdar sany 500 myńǵa jýyq
ASTANA. QazAqparat - Elimizde tabysy kúnkóristiń eń tómengi deńgeıinen tómen halyqtyń úlesi 2014 jyldyń 2 toqsanynda 2,9 paıyzdy nemese 497,7 myń adamdy qurady. Atalǵan kórsetkish ótken jylǵy tıisti kezeńnen 0,3 paıyzǵa tómen. Bul týraly QR Ulttyq ekonomıka mınıstrligi Statıstıka komıtetiniń baspasóz qyzmetinen habarlandy.
Komıtet málimetine qaraǵanda, tabysy kúnkóristiń eń tómengi deńgeıiniń shamasynan tómen aýyldyq jerdegi halyqtyń úlesi qalalyq jerdegi halyqtyń úlesinen 4 esege artyp, jalpy aýyl halqynyń 4,9 paıyzyn nemese 384,1 myń adamdy qurap otyr. Sonymen qatar, 2014 jyldyń 2 toqsanynda tabysy kúnkóris deńgeıinen tómen halyqtyń basym úlesi Ońtústik Qazaqstan (5,5 paıyz), Jambyl (3,6 paıyz) oblystaryna tıesili bolsa, eń az úlesi Astana (0,3 paıyz) jáne Almaty (0,7 paıyz) qalalarynda baıqalady.
«Úı sharýashylyqtarynyń aqshalaı shyǵystary olardyń materıaldyq qamtamasyz etilýine tikeleı baılanysty. Halyqtyń shyǵystary men tutynýy detsıldik bólý kezinde tabystar sııaqty aıtarlyqtaı saralanýdy kórsetedi. Mysaly, 2014 jyldyń 1 toqsanynda 10 paıyz eń az jáne 10 paıyz eń kóp qamtamasyz etilgen halyqtyń azyq-túlik taýarlaryna jumsaǵan shyǵystary arasyndaǵy aıyrmashylyq 4,2 eseni, azyq-túlik emes taýarlarǵa - 6,1 eseni, al aqyly qyzmetterge - 8,2 eseni qurady», - delingen baspasóz baıanynda.
