Elimizde tabıǵı monopolııanyń usaq sýbektileri kezeń-kezeńmen biriktiriledi

ASTANA. QazAqparat - 2020 jylǵa deıingi tarıftik saıasat boıynsha jańa baǵdarlama jobasynda Qazaqstandaǵy usaq bytyrańqy tabıǵı monopolııa sýbektilerin kezeń-kezeńmen biriktirý usynyldy. Bul týraly búgin QR Tabıǵı monopolııalardy retteý agenttiginiń keńeıtilgen alqa májilisinde vedomstvo basshysy Murat Ospanov aıtty.

Onyń aıtýynsha, tabıǵı monopolııanyń, ásirese energetıka jáne sýmen qamtamasyz etý salasynda usaq sýbektilerdiń bolýy retteletin qyzmetterdiń baǵasyna da, sapasyna da keri áser etedi.

Sonymen qatar, energetıka salasynda shaǵyn energııa taratýshy uıymdardyń kóp bolýy elektr energııasynyń túpkilikti baǵalaryn jasandy túrde kóterýge alyp keledi, bul halyqtyń ál-aýqatyna, sondaı-aq básekege qabiletti otandyq ónimderge keri áserin tıgizedi.

«Osyǵan oraı Agenttik aǵymdaǵy jaǵdaıdy jan-jaqty talqylap, usaq bytyrańqy tabıǵı monopolııa sýbektilerin kezeń-kezeńmen biriktirýge bolady dep esepteıdi», - dep atap ótti TMRA basshysy.

Joba boıynsha aldymen qalalardaǵy sý arnalaryn biriktirý kózdelip otyr. Óıtkeni, olardyń barlyǵy memleket menshiginde. Sodan keıin jylýmen jabdyqtaý salasyndaǵy kásiporyndar jáne keleshekte - elektrmen jabdyqtaıtyn kásiporyndar biriktiriledi.

Mamandardyń aıtýynsha, elimizdegi irili-usaqty 82 qalada 9 mln.-ǵa jýyq adam turady. Osylaısha eldiń kóptegen turǵyndary bir ýaqytta sapaly qyzmetke qol jetkize alady.