Elimizde Syrym Datulynyń 275 jyldyǵy atalyp ótiledi

ORAL. QazAqparat - Batys Qazaqstandaǵy tarıhı óńirdiń biri - Syrym aýdanynda Syrym Datulynyń 275 jyldyǵyna jáne Alashordanyń 100 jyldyǵyna oraı kóptegen sharalar uıymdastyrylmaq. Bul týraly Qadyr Myrza Álı atyndaǵy mádenıet jáne óner ortalyǵynda «Qazaqstannyń ótkeni syrly, bolashaǵy nurly» degen taqyrypta oblys tarıhshylary bas qosqan dóńgelek ústel otyrysynda aýdan ákimi Abat Shynybekov málim etti.

Onyń aıtýynsha, aldaǵy jyly qol bastaǵan batyr, kósem ári sheshen Syrym Datulynyń 275 jyldyǵy keńinen atalyp ótilmekshi. Sonymen qatar Alashordanyń 100 jyldyǵyna baılanysty sharalar uıymdastyrylady. Alashordanyń Batys bólimi qazirgi Syrym aýdanynyń ortalyǵy Jympıty aýylynda oryn tepkeni, ony Alash arystary, el «eki dos» dep atap ketken Jahansha jáne Halel Dosmuhamedovter basqarǵany belgili. Osyǵan oraı tarıhshylarmen, zııaly qaýym ókilderimen aldyn ala kezdesip, aldaǵy sharalar jóninde aqyldasyp alý qajettigi týyndap otyr.

Jıyn barysynda ólketanýshy Jaısań Aqbaı, oblystyq máslıhat hatshysy Málik Qulshar, tarıh ǵylymdarynyń doktory, professor Murat Sydyqov, tarıhshy Jańabek Jaqsyǵalıev, «Jaıyq Press» JShS bas dırektory Jantas Safýllın jáne basqalar sóz alyp, óz oı-pikirlerin, usynystaryn ortaǵa saldy.

Aıta keteıik, QR táýelsizdiginiń 25 jyldyǵyna oraı «Beıbitshilik pen kelisimniń jol kartasy» megajobasy aıasynda Syrym aýdanynyń Oral qalasyndaǵy mádenıet kúnderi osy Qadyr ortalyǵyndaǵy «Táýelsizdikke tartý» atty kórmemen ashyldy. Onda aýdan sýretshileri men qolóner sheberleriniń týyndylary qoıyldy. Kórmeniń ashylý rásiminde belgili aqyn, halyqaralyq «Alash» syılyǵynyń laýreaty Aqushtap Baqtygereeva ónerli eldiń órenderine tabys tiledi. Aýdannan kelgen ónerpazdar án shyrqap, kúı kúmbirletti.

Qala kúni aıasynda Syrym aýdanynyń ókilderi «Beıbitshilik pen kelisimniń jol kartasy» megajobasynyń estafetasyn qalalyqtarǵa saltanatty jaǵdaıda tabys etpekshi.