Elimizde sút bezi obyry jasaryp keledi - dárigerler
ASTANA. QazAqparat - Elimizde alǵash ret sút bezi obyry men melanoma dertin emdeýdiń qaýipsiz operatsııasy jasaldy, dep habarlaıdy Habar 24 .
Búgin Prezıdent is Basqarmasynyń medıtsınalyq ortalyǵynda reseılik dárigerler qazaqstandyq áriptesterimen tájirıbe almasyp, Astana qalasynyń Onkologııalyq ortalyǵynda alǵashqy naýqasty qabyldady.
Otandyq aqhalattylardyń aıtýynsha, elimizde sút bezi obyry jasaryp keledi.
Al aýrýy asqynǵan naýqastardyń keýde tusyndaǵy lımfa túıinderi túgel joıylady. Osylaısha, qaterli isiktiń aldyn alýǵa bolady. Biraq operatsııa aıaqtalǵan soń emdelýshiniń birden aıyǵyp ketýi búginge deıin kúmándi bolyp kelgen edi. «Endigi jaǵdaı basqasha», - deıdi dárigerler.
Buryn onkologııalyq derttiń osy túrinen jasy 25-30-dan asqan qyz-kelinshekter emdelse, búginde 18-ge endi tolǵan boıjetkender de pyshaq astyna túsýge májbúr.
«Aýyrǵan syrqat adamǵa radıofarm preparat beriledi taǵy. Apparat arqyly belgisi belgili bolady, sol jerge dárigerler belgi qoıyp, operatsııa ústinde sol jerdiń ǵana bezin alyp tastaıdy», -deıdi Astana qalasynyń Onkologııa ortalyǵynyń bas dárigeri Muhtar Tóleýtaev.
Ýltradybysty zertteý men mammografııa qorytyndysynan derttiń 1 jáne 2-shi dárejeleri anyqtalsa, tek bastapqy lımfa túıini tekseriledi. Ol úshin nanokolloıd qospasy men tehnetsıı hımııalyq elementiniń qosyndysy naýqastyń keýde tusyna ekpe retinde qoldanylady. Radıoaktıvti farmatsevtıkalyq preparat obyrdyń damý jolyn aldyn ala anyqtap, derttiń asqyný yqtımaldylyǵy týraly belgi beredi.
Osyǵan oraı Aleksandr Nıkıforov atyndaǵy Jalpyreseılik shuǵyl jáne radıatsııalyq medıtsına ortalyǵynyń ıadrolyq medıtsına bóliminiń meńgerýshisi Vıacheslav Sýhov ta óz oıyn bildirdi.
«Paıda bolǵan isikti joıý kezinde oǵan eń jaqyn ornalasqan lımfa túıini de alynady. Bul rette birden shuǵyl taldaý júrgizilip, zaqymdalǵany anyqtalsa, operatsııa jalǵasyp, ózge lımfa túıinderi de birtindep tekseriledi. Al bastapqy túıini saý bolyp shyqsa, operatsııa toqtatylyp, naýqas 1-2 kúnde úıine shyǵarylady. Emdelýshiniń keıingi densaýlyǵyna esh qaýip tónbeıdi. Bul medıtsınalyq tásildiń basty artyqshylyǵy osy»,- dep atap ótti Búkilreseılik shuǵyl jáne radıatsııalyq medıtsına ortalyǵynyń ıadrolyq medıtsına bóliminiń meńgerýshisi Vıacheslav Sýhov.
