Elimizde sýmen qamtamasyz etý júıesin jańǵyrtý men damytýdyń tehnıkalyq-ekonomıkalyq negizdemesin ortalyqtandyryp ázirleýge kóshý josparlanyp otyr

Bul týraly búgin Úkimet otyrysynda Qurylys isteri jáne turǵyn úı kommýnaldyq sharýashylyǵy agenttiginiń tóraǵasy Serik Nokın málim etti, dep habarlaıdy QazAqparat.

Onyń aıtýynsha, bul turǵyn úı kommýnaldyq sharýashylyǵyn jańǵyrtý jáne damytý tujyrymdamasyna sáıkes jáne eldimekenderdi sýmen qamtamasyz etý máselesinde birtutas memlekettik saıasatty júrgizý maqsatynda jasalǵaly otyr. Jumys úsh kezeń boıynsha júredi. 2010 jyly oblys ortalyqtaryndaǵy sýmen qamtamasyz etý jáne sý tartý nysandaryna zertteý júrgizý, sondaı-aq Kókshetaý qalasy boıynsha tehnıkalyq ekonomıkalyq negizdemeni ázirleý kózdelýde. 2011 jyly Atyraý men Shymkent qalalary boıynsha tehnıkalyq ekonomıkalyq negizdemeni aıaqtaý josparlanýda. Al, 2012-2014 jyldary qalǵan qalalar boıynsha tehnıkalyq ekonomıkalyq negizdemeni ázirleýdi aıaqtaý kózdelýde.«Qajetti qarjynyń jalpy somasy - 3,7 mlrd. teńgeni quraıdy. Onyń ishinde 2010 jyly - 500 mln. teńge, 2011 jyly - 460 mln. teńge, 2012-2014 jyldary - 2,7 mlrd. teńge qajet. Tıisti ınvestıtsııalyq usynystar Ekonomıka mınıstrligine jiberildi», dedi agenttik tóraǵasy.