Elimizde sýıtsıdke barmaq bolǵan 103 adamnyń 70 paıyzy «kókkıt» oıynynyń shyrmaýyna túsken

111 nómirli jedel qyzmet jumysynyń arqasynda óz-ózine qol salmaq bolǵan balalar men jastarǵa ýaqtyly kómek kórsetilgen, dep habarlaıdy «QazAqparat» HAA tilshisi.

Bul týraly OKQ-da ótken baspasóz máslıhaty barysynda QR Parlamenti Májilisiniń depýtaty, QR Bala quqyqtary jónindegi ýákili Zaǵıpa Balıeva málimdedi.

«Joǵaryda atap ótkenimizdeı, óz-ózine qol salmaq bolǵan 103 balalar men jastardyń 70 paıyzy «kók kıt» oıynynyń saldarynan qıyndyqqa tap bolǵan. Men bul turǵyda quqyq qorǵaý organdarynyń, prokýratýra, UQK-niń júıeli jumysyn erekshe atap ótkim keledi. Biz bárimiz de baılanysta jumys atqaramyz. Bizben Halyqaralyq jeliniń ókilderi habarlasyp jatyr. Ol júıege zamanǵa saı qosylatyn bolamyz. Bizge BUU-dan ıÝNISEF kómek qolyn sozyp jatyr. Halyqaralyq jeliniń qyzmetkerleri bizdiń elge kelip, birlese jumys atqarady», - deıdi Zaǵıpa Balıeva.

111 jedel qyzmeti uıymynyń jetekshisi Ysqaq Qulataıdyń aıtýynsha, 2017 jyldyń 8 aıy boıynsha senim telefonyna 1 mln 376 myń ret qońyraý shalynǵan.

«Senim telefony jobasy tehnıkalyq platforma retinde ótken jyly iske qosylǵan bolatyn. Senim telefonynyń jobasynda 30 operator jumys atqarady. Onyń ishinde zańgerler, psıhologtar bar. Táýligine shamamen 4000-6000 aralyǵynda qońyraý kelip túsedi. Kóp jaǵdaıda qońyraýlar kúndizgi saǵat 10.00-nan túngi saǵat 10.00-ge deıin túsedi», - deıdi Ysqaq Qulataı.

Onyń aıtýynsha, senim telefonynyń jumysynyń 3 qaǵıdaty bar. Eń aldymen kez kelgen abonent kez kelgen ýaqytta senim telefonyna tegin baılanysqa shyǵa alady. Ekinshiden, 111 nómirine Qazaqstannyń kez kelgen núktesinen statsıonarlyq nemese mobıldi telefonnan qońyraý shalýǵa bolady. Úshinshiden, qońyraý shalǵan abonenttiń aqparaty qupııa túrde ustalady.

«Kóptegen mysaldardy keltirýge bolady. Oqys jaǵdaılar kóptep kezdesedi. Eki-úsh kún buryn ǵana Qostanaıdan 3 jasar qyz bala habarlasqan. Úıinde eshkim joqta qulaǵyna zııandy zatty tyǵyp alyp, qınalǵan eken. Bizdiń operatorlar anasyn taýyp alyp, sábıdi qaýipti jaǵdaıdan qutqaryp aldy»,- deıdi ol.