Elimizde sýdy tazartý normatıvteri Eýropalyq standarttarǵa sáıkestendiriledi
NUR-SULTAN. QazAqparat - Qazaqstanda aǵyndy sýlardy tazartý normatıvteri Eýropalyq standarttarǵa sáıkes keltiriledi. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Roman Sklıar aıtty, dep habarlaıdy QazAqparat tilshisi.
Onyń sózine qaraǵanda, 86 qalalyq eldi mekenniń ishinde 58 qalada ǵana kárizdik tazartý qondyrǵylary bar. Olardyń ortasha tozýy 60 paıyzdan asty. 26 qaladaǵy qondyrǵylardy rekonstrýktsııalaý jáne 27 qalada jańadan salý kerek. Atalǵan problemany sheshý úshin aldyn ala baǵalaý boıynsha shamamen 330 mlrd teńge qajet.
«Osy mindetti oryndaý úshin mınıstrlik kárizdik tazartý qondyrǵylaryn salýǵa bıýdjetten tys qarajat tartý tetigin ázirledi. Biz aǵyndy sýlardy tazartý normatıvterin Eýropalyq standarttarǵa sáıkes keltirýdi usynamyz. Bul sarapshylardyń pikiri boıynsha kúrdeli shyǵyndardy 30 paıyzǵa deıin qysqartýǵa múmkindik beredi», - dedi ol.
Mınıstrdiń aıtýynsha, bıogaz óndirý jáne tunbany qaıta óńdeý múmkindigi bar energııa tıimdi tehnologııalar engiziletin bolady.
«Memlekettik-jekeshelik áriptestik jobalaryn iske asyrý úshin turǵyndarǵa salmaq túsirmeý maqsatynda tarıfterdi sýbsıdııalaǵan durys», - dedi Roman Sklıar.
