Elimizde stýdentter sany nebári 50 adamdy quraıtyn joǵary oqý oryndary da bar
ASTANA. 14 qyrkúıek. QazAqparat - Elimizde stýdentter sany nebári 50 adamdy quraıtyn joǵary oqý oryndary da bar. Bul týraly búgin S.Seıfýllın atyndaǵy Qazaq agrotehnıkalyq ýnıversıtetinde bolǵan QR Bilim jáne ǵylym mınıstri Baqytjan Jumaǵulov aıtty.
«Biz joǵary oqý oryndaryn qysqartý maqsatyn alǵa qoıyp otyrǵan joqpyz. Degenmen nebári 50-200 stýdent bilim alatyn álsiz joǵary oqý oryndary da bar. Olar tolyqqandy joǵary oqý oryndary emes. Búginde biz olardy biriktirip, úlkeıtýdemiz. Meniń paıymymsha, bul durys úderis», - dedi mınıstr.
Sonymen qatar B.Jumaǵulov joǵary oqý oryndarynyń kópshilikke qol jetimdiligine alańdaýshylyq tanytty. Onyń alǵa tartqan derekterine sáıkes, sońǵy 10 jyldyń ishinde álemde stýdentter sany 1,5 ese, al elimizde 2,7 ese kóbeıgen.
«Men joǵary bilim alýǵa umtylý óte jaqsy ekendigin bilemin. Degenmen joǵary bilimniń kópshilikke qol jetimdi bolý týrasynda sóz qozǵalǵanda, biz neni joǵaltamyz? Bilim sapasyn joǵaltamyz. Men 240 myń stýdent bilim alatyn Kaır ýnıversıtetinde boldym. Aýdıtorııaǵa kirsem, bir lektor 5-7 myń stýdentke dáris oqyp tur. Bul oraıda bilimniń sapasy týraly sóz qozǵaýdyń ózi artyq qoı», - dedi ol.
