Elimizde sporttyń 15 túrin iriktep, solardy damytýǵa erekshe kúsh salady

NUR-SULTAN. QazAqparat – Elimizde damýyna basym baǵyt beretin sport túrleriniń tizimi jasaldy. Bul týraly QR Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Samat Erǵalıev málim etti, dep habarlaıdy QazAqparat tilshisi.

«Jetken jetistikti de, kemshilikti de jasyrýǵa bolmaıtyn salanyń biri – sport. Onyń nátıjesi BAQ-ta keńinen sóz bolyp, qoǵam talqysyna túsedi. Ózderińiz biletindeı, jaqynda 2 mańyzdy halyqaralyq sport oqıǵasy ótti. Ol - Tokıoda ótken jazǵy Olımpıada jáne Beıjińdegi qysqy Olımpıada oıyndary. Qazaqstan quramasynyń atalǵan oıyndarda kórsetken nátıjesi oıdaǵydaı bolmady. Sonymen qatar, Memleket basshysynyń tapsyrmasy boıynsha bıyl aqpan, naýryz aılarynda 6 óńirdiń jumysyna taldaý jasalyp, birqatar ózekti máseleler anyqtaldy», - dedi Samat Erǵalıev ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, elimizde akkredıttelgen 179 sport túri bar jáne atalǵan salada birqatar reforma qolǵa alynǵan.

«Saralaý boıynsha onyń barlyǵyna memleket bıýdjetinen qarjy qarastyrylǵan. Alaıda sport túrleriniń bárin birdeı tolyqqandy damytý múmkin emes. Sondyqtan, sońǵy 10 jyl ishinde ótken Olımpıada, Azııa oıyndaryndaǵy ulttyq qurama komandalardyń jetistikterin eskere otyryp, mınıstrlik basym sport túrleriniń tizimin anyqtady», - deıdi ol.

Osylaısha, atalǵan vedomstvo 15 sport túrine basym baǵyt berip otyr.

Ol - boks, aýyr jáne jeńil atletıka, júzý, velosport, dzıýdo, áıelder kúresi, grek-rım kúresi, erkin kúres, taekvondo, bıatlon, mánerlep syrǵanaý, frıstaıl jáne shańǵy jarysy.

«Degenmen osy 15 sport túriniń ishinde tek 6-7 sport túrleri Olımpıada jáne álem chempıonattarynda jaqsy nátıjege qol jetkizip júr. Joǵaryda atalǵan sport túrleri boıynsha aldaǵy ýaqytta óńirlerdiń jumysyn baǵalaý júıesi ázirlenedi. Sport ǵalymdary men bilikti mamandardy osy sport túrlerin damytýǵa jumyldyramyz», - deıdi komıtet basshysy.