Elimizde Sporttyq baǵdarlamalaý federatsııasy quryldy, ony Baǵdat Mýsın basqarady
«Byltyr biz Digital Nomads qaýymdastyǵyn jınaǵanymyz esterińizde bolar. Osy ýaqyt ishinde biz Digital Nomads ókilderimen birge Qazaqstandyq oqýshylar men stýdentterge arnap, turaqty dáristerdi uıymdastyrdyq, sondaı-aq sporttyq baǵdarlamalaýdy qoldaý boıynsha jumystar júrgizdik. Men elimizde ózimizdiń sporttyq baǵdarlamalaý federatsııasynyń qurylǵanyn qýana habarlaǵym kelip otyr, al maǵan oǵan jetekshilik etý mártebesi buıyrdy», - dep jazdy QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Facebook-tegi paraqshasynda.
Sondaı-aq ol sporttyq baǵdarlamalaýdyń áleýeti zor ıntellektýaldy sport túri ekenin eske salady.
«Munda jasóspirimder matematıkalyq algorıtmdik esepterdi baǵdarlamalaý tilderin qoldana otyryp sheshedi. Qazaqstandyq oqýshylar men stýdentter IOI jáne ICPC sııaqty halyqaralyq jarystarǵa turaqty túrde qatysyp, joǵary nátıjelerge qol jetkizýde.
Federatsııany qura otyryp, biz halyq arasynda sporttyq baǵdarlamalaýdy damytý men nasıhattaý jumystaryn júrgizýdi, sondaı-aq osy baǵytta túrli jarystarǵa qatysatyn jastarymyzdyń nátıjelerin odan ári jaqsartýdy josparlap otyrmyz.
Atap aıtqanda, Federatsııa ulttyq jáne halyqaralyq deńgeıde is-sharalar ótkizýdi uıymdastyrady, bilim berý mekemelerinde ekojúıeni damytady jáne sporttyq baǵdarlamashylardy daıarlaý ádistemesin ázirleıdi», - deıdi Baǵdat Mýsın.
Foto: www.facebook.com/BagdatMussin