Elimizde sport sektsııalarymen qamtylǵan oqýshylar sany 27 paıyz ǵana
ASTANA. 21 qazan. QazAqparat - Bilim jáne ǵylym mınıstrliginiń málimetterine qaraǵanda, byltyr elimizdegi sport sektsııalarymen qamtylǵan mektep oqýshylarynyń sany 27 paıyzdy ǵana qurap otyr.
Al álemdik tájirıbede bul kórsetkish mektep oqýshylarynyń 80 paıyzynan astamyn quraıdy. Búgin Májilistegi Úkimet saǵatynda QR Sport jáne dene shynyqtyrý isteri agenttiginiń tóraǵasy Erlan Qojaǵapanov osylaı málim etti.
Agenttik tóraǵasynyń aıtýynsha, mektepterdiń sabaqtan tys oqytýlary úshin azamattyq qyzmetkerlerge jalaqy tóleý bazalyq jalaqysyna 40-50 paıyzdyq ústemeaqyny quraıdy. «Alaıda, zertteýler kórsetkenindeı, bul ústemaqy shamamen 8 myń teńgeni quraıdy. Osynyń ózi eldegi, onyń ishinde aýyldaǵy mektep oqýshylary arasynda buqaralyq sportty jappaı damytýǵa keri áserin tıgizip otyr. Dene shynyqtyrý muǵalimderin de sabaqtan tys sporttyq sharalar uıymdastyrýǵa, jarystarǵa jastardy aparýǵa yntalandyrmaıdy», deıdi E. Qojaǵapanov.
Onyń aıtýynsha, álemdik ozyq tájirıbede bul basqasha damyp otyr. «Máselen, Kanadada sabaqtan tys sport sektsııalary boıynsha muǵalimge mektep oqýshylarynyń tikeleı sanyna qaraı jalaqy tólenedi», dedi Sport agenttiginiń tóraǵasy. Budan bólek, agenttik basshysy mektepterdegi oqý saǵattarynda dene shynyqtyrý sabaqtary aptalyq kórsetkishiniń eki saǵatqa kemigenine de alańdaýshylyq bildiredi.
«Bundaı qysqartý halyqaralyq tájirıbege sáıkes kelmeıdi. Halyqaralyq sporttyq standarttar aptalyq 3-6 saǵatqa artyq. Al bizdegi saǵattardy qysqartý jasóspirimderdiń dene shynyqtyrýy men sporttyq kórsetkishterine keri áser etýi múmkin», - dedi E. Qojaǵapanov.
