Elimizde sport sektsııalary men balalar úıirmeleriniń qyzmeti jandanady
Bul týraly Ortalyq kommýnıkatsııalar qyzmetinde ótken brıfıngide aıtyldy, dep habarlaıdy QazAqparat tilshisi.
«Memleket basshysy Qasym-Jomart Toqaevtiń 2020 jyldyń qyrkúıegindegi «Jańa jaǵdaıdaǵy Qazaqstan: is-qımyl kezeńi» atty Joldaýyn iske asyrý jónindegi jalpyulttyq is-sharalar josparynda Mádenıet jáne sport mınıstrliginiń aldyna elimizdiń turǵyndaryn eń aldymen balalardy buqaralyq sport túrlerimen aınalysýǵa belsendi tartý, sport sektsııalaryn ashý jáne balalar úıirmeleriniń qyzmetin qaıta jandandyrý mindeti qoıylǵan bolatyn. Osy oraıda Zańnama jáne memlekettik tapsyrys ınstıtýtyn engizý arqyly balalar men jasóspirimderge arnalǵan shyǵarmashylyq úıirmeler men sporttyq sektsııalardy jan basyna qarjylandyrýdy kózdeıtin normalar engizildi. Osy jumystardyń atqarylýyna belsendi atsalysqan QR Bala quqyqtary jónindegi ýákil Arýjan Saınǵa úlken alǵysymyzdy aıtamyz», - deıdi QR Mádenıet jáne sport vıtse-mınıstri Nurǵısa Dáýeshov.
Onyń aıtýynsha, bul taraptaǵy jumystar mınıstrliktiń, jergilikti atqarýshy organdar men basqa da memlekettik organdardyń birlese jumys isteýi arqasynda jalǵasyp jatyr.
«Birinshi kezekte, Mádenıet jáne sport mınıstrliginiń buıryǵymen kelesi quqyqtyq aktiler bekitilip, qabyldandy. Birinshi, balalar men jasóspirimderge arnalǵan shyǵarmashylyq úıirmelerge memlekettik shyǵarmashylyq tapsyrysty ornalastyrý jáne olardyń jumys isteý qaǵıdalary. Ekinshi, balalar men jasóspirimderge arnalǵan shyǵarmashylyq úıirmelerge jan basyna normatıvtik qarjylandyrý qaǵıdalary. Úshinshi, memlekettik tapsyrysty jan basyna normatıvtik qarjylandyrý ádistemesi. Tórtinshi, balalar men jasóspirimderge arnalǵan shyǵarmashylyq úıirmelerdiń jáne sporttyq sektsııalardyń reıtıngin anyqtaý qaǵıdalary. Memlekettik shyǵarmashylyq jáne sporttyq tapsyrys 4 jastan 18 jasqa deıingi balalarǵa, onyń ishinde erekshe qabiletteri bar balalarǵa qoldanylatyn bolady. Shyǵarmashylyq úıirmeniń 59 túri qarastyrylǵan. Ár balanyń qyzyǵýshylyǵyna qaraı memlekettik shyǵarmashylyq, sport jáne qosymsha bilim berý tapsyrystar aıasynda kózdelgen 2 úıirmege tegin qatysýǵa bolady», - deıdi ol.
