Elimizde sot jumysynyń jetildirilýi qoǵamnyń quqyq qorǵaý júıesine senimin arttyrady - Qazaqstannyń Azamattyq alıansy
ASTANA. QazAqparat - Qazaqstannyń Azamattyq alıansy zańdy tulǵalar birlestigi Memleket basshysy Nursultan Nazarbaevtyń Qazaqstan Respýblıkasy Prezıdentiniń qyzmetine resmı túrde kirisýine baılanysty quttyqtaý joldady.
«Qurmetti Nursultan Ábishuly!
Biz, mıllıondaǵan azamattyq qoǵamnyń múddesin qorǵaıtyn birlestik retinde Sizdi Qazaqstan Respýblıkasy Prezıdentiniń qyzmetine resmı túrde kirisýińizben quttyqtaımyz! Saltanatty ulyqtaý rásiminde Siz bes ınstıtýtsıonaldyq reformany júrgizýdiń mańyzy men qajettiligin atap óttińiz. Bizdi memlekettik qyzmettegi ózgerister qyzyqtyrady.
Qazaqstanda ekonomıkalyq baǵdarlamalardyń sapaly túrde júzege asýy men sapaly memlekettik qyzmetterdiń kórsetilýin qamtamasyz etetin zamanaýı kásibı jáne avtonomdy memlekettik apparat qurylýy tıis, degen edińiz Siz ulyqtaý rásiminde sóılegen sózińizde. Sondyqtan biz jemqorlyqqa jol berilmeı jáne merıtokratııa qaǵıdattaryn qorǵaý boıynsha jumystardyń oń jolǵa qoıylýyn, Qazaqstandaǵy memlekettik qyzmettiń reformalanýyn qoldaımyz. Aýyl sharýashylyǵy shıkizattary negizinde qaıta óńdeý sektoryn damytý; EAEO aıasynda tarıftik saıasatty jeńildetý; polıtsııaǵa alýda jańa kásibı jáne psıhologııalyq irikteý júıesin engizý; qoǵamda óz-ózin retteýdi qamtamasyz etý; memlekettik qyzmetkerlerdiń eńbekaqysyn ekonomıka men áleýmettik salany damytýǵa qosqan úlesine qarap tóleý júıesi; jergilikti atqarýshy organdardy tańdaýdyń jańa júıesin qurý bes reforma aıasyndaǵy basym baǵyttar bolyp tabylady. Menshik quqyǵy men kásipkerlik qyzmetke jaǵdaı jasaıtyn zańnyń ulyqtylyǵyn qamtamasyz etý mańyzdy. Sot júıesi jumysynyń jetildirilýi, sot korpýsynyń ashyqtyǵy qoǵamnyń quqyq qorǵaý júıesine degen senimin arttyrady dep senemiz. Sondaı-aq qazaqstandyq sottyń ádildigi memlekettiń ınvestıtsııalyq tartymdylyǵyn, otandyq jáne sheteldik ınvestorlardyń quqyqtyq qorǵanysyn arttyrady.
