Elimizde sot sanktsııasymen tutqynǵa alynǵandardyń sany azaıyp keledi
ASTANA. Qazannyń 27-si. QazAqparat /Aıdar Ospanalıev/ - Statıstıkalyq málimetter boıynsha, elimizde sot sanktsııasymen tutqynǵa alynǵandardyń sany kemip otyr. Bul týraly búgin Joǵarǵy sottyń Qylmystyq isterdi baqylaý alqasynyń tóraǵasy Aqyltaı Qasymov málim etti.
Onyń derekterine qaraǵanda, 2009 jyldyń 9 aıyndaǵy málimetter boıynsha, sot -quqyq qorǵaý organdarynyń 18 myń 499 azamatqa qatysty tutqynǵa alý jónindegi qoldaý hattaryn qanaǵattandyrǵan.
Al aǵymdaǵy jyldyń sáıkes merzimindegi kórsetkish 14 myń 654-ti qurap otyr. Elimizde tutqynǵa alýdy sot tarapynan sanktsııalaý sharalary engizilgen kezinen bastap, sotqa sanktsııa berý týraly ótinish bildirýshiler sany 30-35 paıyzǵa kemip otyr. «Munyń sebebi tergeý organdary jeńil jáne ortasha deńgeıdegi ister boıynsha sotty mazalamaıtyn boldy. Olar tek osy toptaǵy jekelegen ister boıynsha ǵana, onyń ózinde isti jan-jaqty teksergennen keıin isti sotqa joldaıtyn boldy. Al jalpy alǵanda sanktsııalaý sharalarynyń basym bóligi kisi óltirý, tonaý, kisi zorlaý sııaqty árekettermen baılanysty. Ol árıne mindetti túrde sanktsııalanýy tıis», dedi Joǵarǵy sot ókili.
Sondaı-aq onyń málimetterine qaraǵanda, elde jeńil ister boıynsha sotqa túsken qoldaý hattardyń tek 2,7 paıyzy, al ortasha deńgeıdegi isterdiń 22 paıyzy ǵana sanktsııalanǵan.
