Elimizde sońǵy on jylda «A» vırýstyq gepatıtimen syrqattaný tómendedi
ASTANA. 4 qazan. QazAqparat - Qazaqstanda sońǵy 10 jyldyń ishinde «A» vırýstyq gepatıtimen syrqattaný turaqty tómendeýi baıqalady.
Mysaly, 2002 jyldan 2011 jyl aralyǵyndaǵy kezeńde syrqattanýshylyq 4,6 esege azaıdy.
QR Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıtetiniń málimetinshe, 2012 jyldyń 8 aıynda 2011 jyldyń sáıkes kezeńimen salystyrǵanda syrqattanýshylyq 38,7 paıyzǵa, onyń ishinde 14 jasqa deıingi balalar arasynda 49,8 paıyzǵa tómendedi.
Jalpy respýblıka boıynsha memlekettik sanıtarııalyq-epıdemıologııalyq qadaǵalaý organdary «A» vırýstyq gepatıtimen syrqattaný deńgeıine aı saıyn monıtorıng júrgizedi jáne sýmen jabdyqtaý, qoǵamdyq tamaqtaný, bilim berý, sondaı-aq mektepke deıingi tárbıeleý nysandarynda sanıtarııalyq-gıgıenalyq talaptardyń saqtalýyn qadaǵalaýdy qamtamasyz etedi.
«A» vırýstyq gepatıtiniń aldyn alýdyń tıimdi ádisi vaktsınatsııalaý bolyp tabylady. «A» vırýstyq gepatıtine qarsy vaktsınatsııalaý «Qarsy profılaktıkalyq egý júrgiziletin aýrýlar tizbesin, olardy júrgizý erejesin jáne halyqtyń josparly egilýge jatqyzylatyn toptaryn bekitý týraly» Qazaqstan Respýblıkasy Úkimetiniń 2009 jylǵy 30 jeltoqsandaǵy № 2295 qaýlysyna sáıkes jergilikti bıýdjet qarajaty esebinen júrgiziledi.
«A» vırýstyq gepatıti - álemde keńinen taralǵan jiti antroponozdyq ınfektsııalyq aýrý, fızıkalyq jáne hımııalyq faktorlarǵa salystyrmaly túrde tózimdiligi joǵary vırýs týdyrady, sonyń arqasynda vırýs qorshaǵan ortada uzaq ýaqyt saqtalady. «A» vırýstyq gepatıti sý, tamaq, turmystyq qarym-qatynas joldarymen taralady. «A» vırýstyq gepatıti kezindegi ınkýbatsııalyq kezeń 50 kúnge deıin, ortasha 35 kúnge sozylady.
