Elimizde smartfondarǵa arnalǵan juqa shynylar shyǵaratyn shaǵyn zaýyt salynady

NUR-SULTAN. QazAqparat – Importty almastyrýdyń 2025 jylǵa deıingi baǵdarlamasy osy jyldyń maýsymynda bekitiledi. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

«Kásiporyndardyń aınalasynda shaǵyn jáne orta bıznes beldeýin qurý maqsatynda Qyzylorda oblysynyń ákimdigimen birlese otyryp, «Orda-Glass» JShS shyny zaýyty bazasynda avtomobıl shynylary, shyny talshyqtary, shynydan jasalǵan ydystar, ydys-aıaq, tereze shynylary men smartfondarǵa arnalǵan juqa shynylar óndiretin shaǵyn zaýyttar sala otyryp, shynydan daıyndalatyn buıymdar óndirisin pysyqtaı bastadyq», - dedi ol.

Mınıstrdiń aıtýynsha, jumys istep turǵan kásiporyndar men jańa jobalarǵa da qatysty osyndaı tásilder qoldanylady. Іri júıe quraýshy kásiporyndardy qoldaý, sondaı-aq shaǵyn jáne orta kásipkerlerge ınfraqurylym usyný esebinen buryn ımporttalǵan taýarlar oqshaýlanatyn bolady.

«Baǵdarlama (Importty almastyrýdyń 2025 jylǵa deıingi baǵdarlamasy) jobasyn ázirleý jumystary naqty keste boıynsha júrgizilýde. Algorıtmge sáıkes naýryz aıynda álemdik tájirıbeni taldap, barlyq óńdeý ónerkásibi boıynsha keshendi saraptama júrgizdik. Sáýirde jobalar pýlyn jasap, is-qımyl algorıtmin ázirledik. Mamyr aıynda qujatty múddeli memlekettik organdarmen jáne uıymdarmen kelisý rásimin aıaqtaýdy josparlap otyrmyz. Maýsymda joba bekitiletin bolady. Óńirlik baǵdarlamalar jergilikti atqarýshy organdarmen qyrkúıek aıyna deıin qabyldanady», - dedi Qaıyrbek Óskenbaev.