Elimizde sıntetıkalyq esirtkimen kúrestiń jańa tásili engizildi

ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine esirtki, psıhotroptyq zattar, sol tektester men prekýrsorlar aınalymyn baqylaý máseleleri boıynsha ózgerister men tolyqtyrýlar engizý týraly» Zańyn eki oqylymda qabyldandy, dep habarlaıdy QazAqparat.

«Osy zań jobasy arqyly Úkimetke úsh qujatty bekitý boıynsha ókilettik berý qarastyrylǵan. Osy oraıda, birinshisinde elimizde baqylaýǵa alynǵan esirtki, psıhotroptyq zattar jáne prekýrsorlar tizimi, ekinshisinde zańsyz aınalymnan alynǵandardy shaǵyn, iri, asa iri mólsherlerge jatqyzý týraly jıyntyq kestesi, al úshinshisinde sýtegi atomdaryn almastyrýshylar tizimi qamtylǵan.  Sonymen qatar, bul qujat aıasynda jańa esirtki zattaryn memlekettik baqylaýǵa qosýdyń negizdemeleri men tártibi anyqtalady. Úkimetke osyndaı ókilettikterdi berý Qylmystyq kodekske engiziletin tolyqtyrýlarda qarastyrylǵan», - dedi QR Іshki ister mınıstriniń birinshi orynbasary Janat Súleımenov.

Onyń sózine qaraǵanda, bul túzetýler naryqta tez paıda bolatyn sıntetıkalyq esirtkiniń jańa túrlerine Úkimet qaýlysymen birden tyıym salýǵa múmkindik beredi.

«Elimizde jańa esirtkiniń taralý joldaryna tosqaýyl qoıamyz. Bul tizimderdi qalyptastyrýdyń osyndaı tájirıbesi dúnıejúziniń kóptegen elderinde qoldanylady. Bizdiń oıymyzsha, mundaı sharalar qazirgi kezde óte qajet. Zań jobasyn qabyldaý áleýmettik-ekonomıkalyq jaǵdaılarǵa nuqsan keltirmeıdi, qosymsha bıýdjettik shyǵyndardy qajet etpeıdi. Atap aıtqanda, elimizde sıntetıkalyq esirtkiniń taralýyna qarsy tıimdi shara bolmaq», - dedi J. Súleımenov.

Budan buryn habarlanǵandaı, QR Іshki ister mınıstri Qalmuhanbet Qasymov sıntetıkalyq esirtkiler qaı elderden jetkiziletinin aıtqan bolatyn