Elimizde «Shıpajaı-2017» II Halyqaralyq ǵylymı - praktıkalyq forýmy ótedi
ASTANA. QazAqparat - «Býrabaı» kýrorttyq aımaǵynda sáýir aıynyń sońynda «Shıpajaı-2017» II Halyqaralyq ǵylymı - praktıkalyq forým ótedi. Forým «Oqjetpes» emdeý-saýyqtyrý kesheniniń qurylýynyń 50 jyldyǵyna arnalady. «Shıpajaı-2017» forýmy - sanatorııalyq-kýrorttyq emdeý, medıtsınalyq ońaltý, kýrorttyq is menedjmentiniń zamanaýı tehnologııalaryn damytýdaǵy tájirıbe almasýdyń jyl saıynǵy alańy bolyp tabylady.
Forým jumysyna medıtsınalyq ońaltý, kardıologııa, ýrologııa, onkologııa, gınekologııa, kýrortologııa, fızıoterapııa, emdik dene shynyqtyrý jáne massaj salasyndaǵy Germanııadan, Chehııadan, Italııadan, Reseıden kelgen jetekshi mamandar qatysady. Sonymen birge álemniń 8 elinen (Qazaqstan, Ázirbaıjan, Chehııa, Germanııa, Bolgarııa, Italııa, Vengrııa, Reseı (Bashqortystan, Tatarstan)) 50 kýrorttyq uıym ókilderi keledi dep kútilýde.
Forým sheńberinde kelesi konferentsııalardy ótkizý josparlanýda:
1.Medıtsınalyq ońaltýdyń zamanaýı ádisteri;
2.Kýrorttyq is menedjmenti.
«Shıpajaı-2017» II Halyqaralyq ǵylymı - praktıkalyq forýmynyń spıkerleri qatarynda Qazaqstannyń ár túrli óńirlerinen jáne shetelderden kelgen iri ǵylymı-zertteý ınstıtýttarynyń, medıtsınalyq ońaltý ortalyqtarynyń, shıpajaı-kýrorttyq mekemeleriniń ókilderi bar.
Esterińizge sala keteıik, byltyr elimizde Qazaqstan Respýblıkasynyń Ulttyq Kýrorttyq Qaýymdastyǵy qurylǵan bolatyn. Sol jyly Almaty qalasynda Ulttyq Kýrorttyq Qaýymdastyqtyń uıymdastyrýymen «Shıpajaı» I Halyqaralyq ǵylymı - praktıkalyq forýmy ótti. Sonymen birge QR Ulttyq Kýrorttyq Qaýymdastyǵy Sýmen emdeý jáne Klımatpen emdelýdiń Álemdik Federatsııasyna múshe bolyp (FEMTEC) kirdi.
Bıyl «Shıpajaı-2017» forýmy aıasynda shıpajaı-kýrorttyq uıymdardyń jáne farmatsevtıkalyq ónim óndirýshileriniń kórmesi uıymdastyrylatyn bolady. Atalǵan is-shara aıasynda sáýir aıynyń basynda «Qazaqstan Respýblıkasy kýrortologııa máseleleri» atty ǵylymı-praktıkalyq jáne aqparattyq jýrnaldyń birinshi nómiri basylyp shyqty. Al 20- sáýirde «Oqjetpes» shıpajaıynda saýyqtyrý ornynyń 50 jyldyǵyna arnalǵan radon sýynyń kózin ashý rásimi ótti. Oǵan qosa dál sol kúni shıpajaı Murajaıyn ashý saltanatty rásimi ótkizildi.
Óz kezeginde, QR Ulttyq Kýrort Qaýymdastyǵy Qazaqstan Respýblıkasy Shıpajaı-kýrort qorynyń Ulttyq tizimin qalyptastyrýmen aınalysýda. Sondaı-aq, bıyl «Oqjetpes» pen «Almaty» shıpajaılary densaýlyq saqtaý salasyndaǵy QR akkredıtatsııalaýdyń ulttyq standarttaryna sáıkes akkredıtatsııalaýdan ótedi. Bundaı shara Qazaqstanda alǵash ret ótkizilgeli otyr.
Aıta keteıik, QR Prezıdenti Іsteri Basqarmasy Medortalyǵynyń shıpajaı-kýrorttyq uıymynyń júıesine 4 shıpajaı kiredi: «Oq-Jetpes», «Almaty», Essentýkıdegi (Reseı) «Qazaqstan» jáne Ystyqkól (Qyrǵyzstan) jaǵalaýyndaǵy «Qazaqstan» shıpajaıy. Atalǵan shıpajaılar «4 pen 5 juldyzdy otel» sanatyndaǵy sáıkestik sertıfıkatyna ıe. Statıstıkaǵa súıinsek, bul uıymdarda jyl saıyn 25 myńnan astam adam em qabyldaıdy jáne saýyǵady. Sondaı-aq, medortalyq shıpajaılarynda 50-den astam saýyqtyrý baǵdarlamasy bar. Ońaltý qyzmetteriniń sapasyn odan ári jetildirý maqsatynda 2021 jylǵa deıin 96 jańa baǵdarlama men ádisteme endirý josparlanyp otyr. Shıpajaı-kýrortty salany kadrmen qamtamasyz etý úshin Shıpajaı-kýrort isiniń ınstıtýtyn ashý máselesi talqylanýda.
Esterińizge sala keteıik, Qazaqstanda nebári 200-den astam shıpajaı jumys isteıdi. Olardyń negizgi bóligi Ońtústik Qazaqstan, Shyǵys Qazaqstan, Qaraǵandy, Almaty, Qyzylorda oblystarynda jáne Almaty qalasynda shoǵyrlanǵan.
