Elimizde sheteldik azamattardy emhanaǵa tirkeý erejesi ózgerdi
ALMATY. QazAqparat – Bıyl eńbek mıgranttary – sheteldikterdi emhanaǵa tirkeý erejeleri ózgerdi. Endi olar emhanaǵa kelisimshartpen nemese erikti medıtsınalyq saqtandyrýmen, sondaı-aq júktelgen medıtsınalyq saqtandyrý shartymen barýy kerek. Jańa erejeler osy jyldyń 14 tamyzynda kúshine endi, dep habarlaıdy QazAqparat Medıtsınalyq saqtandyrý qorynyń Almaty fılıalyna silteme jasap.
Eńbek zańnamasy jáne Halyq densaýlyǵy men densaýlyq saqtaý júıesi týraly kodekske engizilgen ózgeristerge baılanysty emhanalarǵa tirkelý erejeleri men ımmıgranttarǵa medıtsınalyq kómek kórsetý erejeleri ózgerdi.
Buıryqtarǵa engizilgen ózgerister tek EAEO-ǵa múshe elderdiń (RF, Belarýs, Qyrǵyzstan, Armenııa) biriniń azamattyǵy bar, QR-da ýaqytsha turatyn sheteldikterge – eńbek mıgranttaryna jáne olardyń otbasy múshelerine (balalary men jubaılaryna) qatysty.
Jańa qaǵıdalarǵa sáıkes, bul sheteldikter emhanaǵa erikti medıtsınalyq shart (EMS) nemese alǵashqy medıtsınalyq-sanıtarııalyq jáne shuǵyl statsıonarlyq kómekke júktelgen medıtsınalyq saqtandyrý sharty (JMS) negizinde tirkeledi. Keıin shart jasasqan merzimi ótken jaǵdaıda medıtsınalyq uıymnan avtomatty túrde shyǵarylady.
Emhanaǵa tirkelý úshin onyń basshysynyń atyna qazaq nemese orys tilinde erkin túrde ótinish jazý qajet. Ótinishpen birge jeke basyn kýálandyratyn qujatty (nemese sheteldik pasportty), EMS nemese JMS shartyn tapsyrady. Olardyń zańdy ókili ótinish berse, otbasy músheleriniń kelisimi qosa berilýi kerek. Ótinish berýshi medıtsınalyq uıymǵa ózi júgine alady nemese ony saqtandyrý kompanııasy jasaıdy.
Tirkelýge bolatyn emhanalardyń tizimi sharttyń qosymshasynda (EMS nemese JMS) kórsetilýi tıis.
Aıta ketý kerek, áleýmettik medıtsınalyq saqtandyrý qorymen shartqa otyrǵan alǵashqy medıtsınalyq-sanıtarııalyq kómek kórsetetin medıtsınalyq uıymdarǵa tirkelýge bolady. EAEO shartynda sheteldikterdiń densaýlyq saqtaý salasyndaǵy quqyǵy ǵana emes, mindetteri de jazylǵan. Olardyń qataryna aýrýlardy erte anyqtaý úshin profılaktıkalyq skrınıngterden ýaqytyly ótý, áıelderdi júktilik boıynsha ýaqytyly esepke qoıý (12 aptaǵa deıin), sozylmaly jáne áleýmettik mańyzy bar aýrýlardy dınamıkalyq baıqaý jáne t.b. kiredi.
Sondaı-aq Qazaqstanda ýaqytsha turatyn sheteldikter aınalasyndaǵylarǵa qaýip tóndiretin aýrýlar kezinde kórsetiletin medıtsınalyq kómekti qospaǵanda, respýblıkada turaqty turatyndarǵa ǵana kórsetiletin tegin medıtsınalyq kómektiń kepildik berilgen kólemi (TMKKK) sheńberinde medıtsınalyq kómek ala almaıdy.
Qazaqstan azamattary, qandastar jáne QR aýmaǵynda turaqty turatyn sheteldikter úshin emhanaǵa tirkelý tártibi ózgerissiz qalady.
