Elimizde shegeli dóńgelekterge tyıym salynbaıdy
ASTANA. QazAqparat - Qazaqstanda avtokólik júrgizýshilerine shegeli dóńgelekterdi paıdalanýǵa shekteý qoıylmaıdy. Bul týraly búgin QR Prezıdenti janyndaǵy OKQ-de ótken brıfıngte QR Investıtsııalar jáne damý mınıstrliginiń birinshi vıtse-mınıstri Jeńis Qasymbek aıtty.
«Meniń biletinim, álem boıynsha shegeli dóńgelekter keńinen paıdalanylady. Al tabıǵatymyzdy eskere otyryp, bizdiń elimizdegi respýblıkalyq joldarda mundaı dóńgelekterdi paıdalaný asa qajet. Bizde respýblıkalyq mańyzdaǵy tas joldarda shegeli dóńgelekterge shekteý qoıý týraly eshqandaı jospar joq. Al qala ishindegi joldarǵa keler bolsaq, kólikter kóp júretin jerlerde, baǵdarsham aldyndaǵy joldarda shegeli dóńgelekterdiń asfaltqa keltiretin zııany bolýy múmkin. Álemniń keıbir elderinde mundaı dóńgelekterge salynatyn tyıym bar. Degenmen bul másele tolyǵyraq zertteýdi talap etedi», - dep atap ótti ol jýrnalısterdiń qoıǵan saýalyna oraı.
Esterińizge sala keteıik, bıyl QR Prezıdentiniń qatysýymen ótken elordanyń damýyna baılanysty jınalysta Astana qalasynyń burynǵy ákimi Imanǵalı Tasmaǵambetov júk kólikterimen qatar shegeli dóńgelegi bar jeńil kólikter de qala joldarynyń tez buzylýyna sebepker bolýda ekenin aıtqan edi. Onyń málimetinshe, qystyń 6 aıynda shegeli dóńgelegi bar kólikter jol asfaltiniń 1 santımetr qabatyn syryp tastaıdy.
Aıta keteıik, 2015 jyldyń 1 qańtarynan bastap Keden odaǵynyń jańa Tehnıkalyq reglamenti óz kúshine enedi. Ol boıynsha jeltoqsannan aqpan aıyna deıin qysqy dóńgeleksiz kólikti paıdalanýǵa tyıym salynady. Degenmen onda dóńgelektiń shegeli nemese shegesiz bolýy tıistigi naqtylanbaǵan.
