Elimizde shamamen 323 myń adam eńbek jaǵdaıy zııandy jáne qaýipti óndiristerde jumys isteýde
TANA. 24 qazan. QazAqparat /Qanat Mámetqazyuly/ - Elimizde eńbek jaǵdaıy zııandy nysandarda jáne qaýipti óndiristerde jumys isteıtin adamdardyń sany shamamen 323 myń adamdy quraıdy.
Búgin Parlament Májilisinde «Múmkindigi shekteýli azamattardyń quqyqtaryn qamtamasyz etý máseleleri» taqyrybynda ótken Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
«Múgedektikke ushyraý kóp jaǵdaıda kásiptik aýrýlar men óndiristik jaraqattarmen tikeleı baılanysty bolyp otyr. Bul rette múgedekterdiń jalpy sanynyń 1 paıyzǵa jýyǵy osyndaı jaǵdaıǵa tap bolǵandardy qurap otyr. Al Statıstıka agenttiginiń derekterine qarasaq, eńbek jaǵdaıy zııandy jáne qaýipti óndiristerde jumys isteıtin adamdardyń sany shamamen 323 myń adamdy quraıdy. Onyń 79 myńy áıelder», - deıdi G. Ábdiqalyqova.
Onyń aıtýynsha, 2010 jyldan beri elimizdiń kásiporyndarynda táýekeldi baǵalaý júıesi engizilgen. Sondaı-aq byltyrǵy jyly memlekettik eńbek ınspektsııasy shamamen 4 myń kásiporynǵa tekserý júrgizgen bolatyn. Nátıjesinde nysandardyń 28 paıyzynyń táýekeldik dárejesi joǵary bolsa, 35 paıyzy táýekeldik dárejesi ortashaǵa jatqyzylǵan. «Osyǵan baılanysty mınıstrlik táýekeldigi joǵary nysandarǵa tekseristi jıiletip otyr. Bundaı nysandar kórsetilgen kemshilikterdi túpkilikti joımasa, tekseris qaıta-qaıta uıymdastyryla beredi», - deıdi mınıstr.
Budan bólek, vedomstvo basshysy eńbek etý qabiletinen aıyrylý qateriniń áleýmettik saqtandyrý júıesiniń damý joldaryna toqtalyp ótti.
