Elimizde shaǵyn jáne orta baılanys operatorlaryn damytý úshin qandaı sharalar qabyldandy

ASTANA. QazAqparat – Premer-Mınıstr Álıhan Smaıylov Májilis depýtattarynyń saýalyna oraı elimizde shaǵyn jáne orta bıznes operatorlaryn damytý úshin qabyldanǵan sharalardy atady, dep habarlaıdy QazAqparat tilshisi.

«Shaǵyn jáne orta baılanys operatorlaryn damytý úshin mynadaı sharalar qabyldandy: «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zań aıasynda jergilikti atqarýshy organdarǵa baılanys jelilerin qurýdy jáne paıdalanýdy uıymdastyrý múmkindigi usynyldy. «Baılanys týraly» Zań aýqymynda elektr berýdiń áýe jelileri arqyly talshyqty-optıkalyq baılanys jelilerin júrgizý múmkindigi kózdelgen. Elektr berýdiń áýe jelileri arqyly talshyqty-optıkalyq baılanys jelilerin júrgizý jónindegi tehnıkalyq sıpattamalar bóliginde elektr qondyrǵylaryn ornatý qaǵıdalary ózektilendirildi. Baılanys jelilerin tóseý úshin kábildik kárizge ashyq qoljetimdilikti qamtamasyz etý bóliginde Kábildik kárizdi paıdalanýǵa berý qaǵıdalary ózektilendirildi», - dep atap ótedi Úkimet basshysy jaýabynda.

Sonymen qatar Álıhan Smaıylov osy jyldyń basynan beri oblystar men respýblıkalyq mańyzy bar qalalardyń ákimdikteri shaǵyn jáne orta baılanys operatorlarymen turǵyndardyń Internet jelisine qoljetimdiligin qamtamasyz etý boıynsha memorandýmdar jasasyp, jol kartalaryna qol qoıylǵanyn atap ótedi.

«Qabyldanǵan sharalar shaǵyn baılanys operatorlaryn jáne ınfraqurylymdy damytýǵa, sondaı-aq jergilikti atqarýshy organdarmen ózara is-qımyldy kúsheıtýge baǵyttalǵan», - dedi Premer-Mınıstr.