Elimizde sekseýildi zańsyz kesý men satý sharalaryna qatań baqylaý júrgiziledi - E. Nysanbaev
ASTANA. Aqpannyń 18-i. QazAqparat /Qanat Mámetqazyuly/ - Aǵymdaǵy jyldan bastap respýblıka boıynsha sekseýil aǵashyn zańsyz kesý men satý qatań qadaǵalanatyn bolady.
Búgin ormandy qorǵaý jáne zańsyz ań aýlaýǵa qarsy kúres sharalarynyń qorytyndysy jóninde ótken baspasóz máslıhatynda AShM Orman jáne ań sharýashylyǵy komıtetiniń tóraǵasy Erlan Nysanbaev osylaı málim etti, dep habarlaıdy QazAqparat.
«Qazirgi tańda respýblıkanyń ońtústiginde sekseýil alqaptaryn saqtap qalý máselesi erekshe alańdaýshylyq týdyryp otyr. Qumdardyń kóshýin boldyrmaý úshin bul aǵashtyń tıgizer paıdasy mol ekendigi belgili. Sondyqtan da, sekseýilderdi qorǵaý maqsatynda júıeli sharalar atqarylatyn bolady. Atap aıtqanda, sekseýil ormandaryn joıýǵa, kesýge qatysty tyıym salynǵan qaýlylar kúsheıtilip, arnaıy bappen tolyqtyryla túsedi. Máselen, Jambyl oblysynda sekseýil ormandarynda bundaı aǵashtyń kez-kelgen túrlerin kesýge tyıym salynady. Al bundaı orman alqaptaryn eski, shirigen sekseýilden tazartý jumystary tek arnaıy mekemeler tarapynan júrgiziledi», dedi E. Nysanbaev. Onyń aıtýynsha, aǵymdaǵy jyldan bastap respýblıka aýmaqtaryndaǵy sekseýil satylatyn kez-kelgen joldyń boıy, bazarlar tekseriletin bolady. «Bazarlardaǵy bundaı saýdalar qatań baqylaýda bolady», dedi E. Nysanbaev.
