Elimizde saılaýdy baqylaý týraly hartııa qabyldandy
«Bul hartııada Adam quqyqtarynyń jalpyǵa birdeı deklaratsııasynyń, BUU-nyń Azamattyq jáne saıası quqyqtar týraly halyqaralyq paktisiniń, Kopengagen keńesiniń qujatynda kórinis tapqan EQYU prıntsıpteriniń, demokratııalyq saılaý standarttary týraly Konventsııanyń, elimizdiń Konstıtýtsııasy men ulttyq zańnamany negizge ala otyryp, saılaýdyń mańyzy men róli kórsetilgen. Biz saılaý protsesine qatysýshy ıaǵnı baqylaýshy retinde azamattardyń saılaý quqyqtary men bostandyqtaryn qorǵaýdy qamtamasyz etpekpiz», - dedi qoǵam qaıratkeri, atalǵan hartııa ıdeıasynyń avtory Aıgúl Soloveva elordada ótken baspasóz máslıhatynda.
Onyń aıtýynsha, atalǵan hartııa saılaý protsesiniń ádil ótýine baqylaý júrgizýmen qatar, ishki jáne halyqaralyq baqylaýshylarmen ózara yntymaqtasý maqsatyn kózdeıdi.
«Osy hartııa negizinde demokratııalyq, shynaıy, erkin jáne ádil saılaý arqyly halyqtyń kúshi men erik-jigerin bildirý úshin saılaý protsesin baqylaýdy uıymdastyramyz. Elimizdiń Konstıtýtsııasy, saılaý týraly zań, sondaı-aq azamattardyń saılaý jáne saılaný quqyqtaryn qamtamasyz etetin ózge de normatıvtik quqyqtyq aktilerdi túsindirýge baǵyttalǵan qoǵamdyq qyzmetterdi usynatyn bolamyz. Sonymen qatar, bul qujatta saılaý týraly zańnamany taldaý, saılaý aldyndaǵy naýqanǵa monıtorıng júrgizý jáne saılaý kezinde oryn alýy múmkin zańbuzýshylyqtardy qadaǵalaý jáne zertteý máselesi qarastyrylǵan», - deıdi ol.
Hartııa ıdeıasy avtorynyń pikirinshe, saılaýǵa baqylaý júrgizý kezinde QR Konstıtýtsııasy, saılaý týraly zań jáne saılaýda baqylaýdy júzege asyrýǵa qatysty halyqaralyq aktiler basshylyqqa alynatyn bolady.
Aıta ketsek, atalǵan is-shara elordadaǵy Saılaýdy beıpartııalyq baıqaý ortalyǵynyń uıymdastyrýymen ótti. Atalǵan ortalyq Qazaqstannyń azamattyq alıansynyń, Qazaqstan kásipodaqtar federatsııasynyń jáne basqa da qoǵamdyq uıymdardyń birigýimen jýyrda ǵana qurylǵan bolatyn.
