Elimizde saıası partııany tirkeý talaptary jeńildedi
ASTANA. QazAqparat – Qazaqstanda saıası partııa quryp, ony tirkeý protsesi jeńildedi. QR Ádilet vıtse-mınıstri Alma Muqanova osyndaı málimdeme jasady, dep habarlaıdy QazAqparat tilshisi.
«Saıası partııalardy tirkeýge qoıylatyn talaptar ózgeredi. Endigi ýaqytta saıası partııany tirkeý úshin 20 myń emes, 5 myń múshe jetkilikti. Al óńirlik ókildikteriniń sany 600-den 200 adamǵa deıin azaıtyldy. Sol sııaqty saıası partııa qurý úshin azamattardyń bastamashyl tobynyń eń azy 1 myńnan 700 adamǵa deıin tómendetildi. Odan bólek, partııa qurý jónindegi quryltaı sezin ótkizý merzimin 2 aıdan 3 aıǵa deıin ulǵaıtý boıynsha túzetý kózdelgen»,- dedi Alma Muqanova OKQ-de ótken brıfıngte.
Sondaı-aq, vıtse-mınıstrdiń aıtýynsha, jer jáne onyń resýrstaryn halyq menshigine belgileýde Konstıtýtsııanyń 6-babyna naqtylaıtyn túzetýler engizildi.
«Kelesi zańnamalyq ózgeris bul sýdıalyq laýazymdarǵa konkýrstyq rásimderdi onlaın-translıatsııalaýdy engizýge qatysty. Sol sııaqty norma shyǵarý protsesin jeńildetýge jáne normalardy retteý deńgeılerin naqtylaýǵa, máslıhat tóraǵasy laýazymyn engizýge baǵyttalǵan jekelegen túzetýler qarastyryldy», - deıdi ol.
Buǵan deıin QR Parlamenti men Úkimetiniń ókilettigine qatysty zańnamaǵa birqatar ózgeris engizilgenin habarlaǵan edik.
