Elimizde saýynshylar men malshylardy robottar almastyrýda
ASTANA. QazAqparat - Ordabasydaǵy taýarly sút fermasy robottyq tehnologııany óndiriske engizdi. Bastapqyda saýynshyny qultemir almastyrǵan, endi sıyrlardyń jem-shóbin de robot retteıdi. Bul týraly Habar 24 habarlaıdy.
Ferma alǵashynda shvetsııalyq qurylǵymen sút óndirip kelse, búginde Nıderland elinen ákelingen robot-saýynshylarmen jabdyqtalyp jatyr. Óz ónimderin óńdeýge kóshken óndiristiń sút zaýyty taǵy bar. Fermadaǵy Majarstannan ákelingen Golshtın tuqymdy sútti sıyrlar táýligine 10 myń tonna sút beredi.
Qazir qoradaǵy mal basy ósken. 900-den astam iri qaranyń 400 basy saýylady. Bir qultemir-saýynshy táýligine 60 sıyrdy úsh retten saýady. Zeńgi baba tuqymy kóbeıgennen soń, fermada sıyr turatyn keshenniń de sany artqan. Jańa qoralarǵa Gollandııadan ákelingen robottar qoıylypty. Munda barlyǵy avtomattandyrylǵan. Bul, bir jaǵynan, sıyrlardan sútti kóbirek alýǵa jaǵdaı jasaıdy.
«Bul robottardyń aıyrmashylyǵy, qazirgimen salystyrǵanda birshama arzan. Aldyńǵy robottar bir sıyrdy 7-8 mınýt saýsa, bul 5 mınýtta saýady. Bir robotqa 60 emes, 70 sıyrdan kelip otyr. Endi 4-qoraǵa osy eki robotty qoıdyq. Qazir iske qosyp jatyrmyz. Aldaǵy ýaqytta kóńilden shyqsa, jyldan-jylǵa sıyr basy kóbeıgendikten 5-6-qora salamyz dep josparlap otyrmyz. Buryndary qorada bul jumysty ár saǵat saıyn bir maman atqaratyn. Al qazir jumysshynyń eńbegin robot almastyrǵan. «Malshy» dep atalatyn bul qurylǵy, ıaǵnı sıyrdyń jem-shóbin jınaıdy, tazalaıdy. Sondaı-aq durys tamaqtanýyn qadaǵalaıdy. «Malshy» atalyp ketken bul robot 20 mınýt jumys jasap, 40 mınýt qýat kózinen nár alady. Salmaǵy 600 kelige jetetin qurylǵy ázir elimizde osy fermada ǵana bar. Kásiporyn qazir óz ónimderin ózderi óńdeýge kóshken. Munda aıran, qaımaq, qurt, tipti irimshikke deıin daıyndalady. Zaýyt táýligine 50 tonna sút óndirýge qaýqarly. Eń bastysy, daıyn ónimder taza ári eshbir qospasyz. Bulardy 7-15 kún aralyǵynda salqyn jerde saqtalady.
Sút zaýytqa jetkizilgennen bastap zerthana baqylaýynda bolady»,- deıdi seriktestik dırektorynyń orynbasary Abylaı Ábishev.
«Josparymyz - zaýyt kólemin ulǵaıtý. Bizdiń bólimnen mıkrobıologııalyq bólim ashý. Ol bizdiń jumysymyzdy jeńildete túsedi jáne ózimizdiń uıytqylardy óndirsek dep jatyrmyz. Ol taýarymyzdyń sapasyn ulǵaıtyp, ózindik baǵasyn birshama túsirer edi»,- deıdi sút zaýytynyń sapany qadaǵalaý bóliminiń basshysy Nursultan Joljanov.
Seriktestik aldaǵy ýaqytta buqtyrylǵan sıyr etin daıyndaıtyn zaýyt salýdy josparlap otyr. «Al túpki maqsat - san emes, sapaǵa mán berý», - deıdi kásiporyn jetekshileri.
