Elimizde saýyqtyrý demalysymen qansha bala qamtylady
ASTANA. QazAqparat - Byltyr respýblıkamyzda saýyqtyrý demalysymen 2 mln. 220 myń bala qamtyldy. Bul týraly «Baldáýren» oqý-saýyqtyrý ortalyǵynda 2017 jylǵa arnalǵan jazǵy demalys máseleleri boıynsha respýblıkalyq semınar-keńeste málim boldy, dep habarlaıdy QazAqparat.
«Jergilikti atqarýshy organdardyń málimeti boıynsha 2016 jyly respýblıkamyzda saýyqtyrý demalysymen 2 mln.220 myń bala (86,7 paıyz) qamtylǵan. Bul kórsetkish aldyńǵy jylmen salystyrǵanda 2,7 paıyzǵa artty»,-dep atap ótilgen QR BǴM Balalardyń quqyqtaryn qorǵaý komıtetiniń málimetinde.
Onyń ishinde jetim balalar men ata-ana qamqorlyǵynsyz qalǵan balalar sany 15 paıyzǵa ulǵaıdy. Budan bólek az qamtylǵan otbasydan shyqqan balalar sany 45,3 paıyzǵa, sondaı-aq múmkindigi shekteýli balalar 38,4 paıyzǵa, daryndy balalar sany 57,2 paıyzǵa artty.
Atap aıtqanda, bilim basqarmalarynyń derekterine súıensek, elimizde 2016 jyly 12 689 saýyqtyrý lagerleri men alańdar jumys istegen. Onyń ishinde 240 qala syrtyndaǵy lagerler, jyl boıǵy jumys isteıtin 15 demalys orny, 11 137 mektep janyndaǵy lagerler, sondaı-aq 1298 shatyrly nemese kıiz úıli, sporttyq jáne ólketanýshylyq lagerler bar.
