Elimizde saýdanyń 0,45 paıyzy ǵana ınternet arqyly jasalady
ALMATY. 14 qarasha. QazAqparat - Qazaqstandyq bank kartochkalaryn qoldanýshylar 2015-2016 jyldary elektrondyq tólemderge 3 mlrd. dollar qarjy jumsaýy múmkin. Bul týraly búgin Almatyda jańadan qurylǵan Internet bıznes pen mobıldi kommertsııanyń qazaqstandyq qaýymdastyǵynyń baspasóz máslıhatynda aıtyldy.
«Túrli baǵalaýlar boıynsha 2012 jyly elimizdegi elektrondyq tólemder naryǵynyń kólemi 300-400 mln. dollardy qurady. Sońǵy 2 jylda ol jylyna 70-80 paıyzǵa deıin ósti. «MasterKard» málimetine qaraǵanda, byltyr qazaqstandyq bank kartochkalaryn qoldanýshylar elektrondyq tólemder arqyly shetelge 1,4 mlrd. dollar aýdarǵan», - deıdi Processing.kz-tiń teń qojaıyndarynyń biri Konstantın Gorojankın. Onyń aıtýynsha, Qazaqstannyń elektrondyq tólemder naryǵy 2015-2016 jyldary 3 mlrd. dollardy quraýy múmkin. 3 jyl buryn jasalǵan bul esepteýler ony rastap otyr. Qazir elimizdegi 1200 ınternet dúkenniń 500-inde ǵana kem degende aptasyna 1 ret tranzaktsııa jasalady. Qalǵandarynda ondaı kórsetkish joq. Jalpy qazir respýblıkadaǵy saýdanyń 0,45 paıyzy ǵana ınternet arqyly júzege asyrylǵan. Al bul Reseıde 4 paıyzdy quraýda.
