Elimizde sanıtarlyq-epıdemıologııalyq jaǵdaı turaqty
ASTANA. 27 mamyr. QazAqparat - Búgin Densaýlyq saqtaý mınıstrliginde Qazaqstan Respýblıkasynyń sanıtarlyq-epıdemıologııalyq qyzmetiniń alqa májilisi bolyp ótti,
dep habarlady atalǵan vedomstvonyń baspasóz qyzmetinen.
«Respýblıkada sanıtarlyq-epıdemıologııalyq jaǵdaı turaqty. 11 ınfektsııa boıynsha aýrý jaǵdaıy tirkelgen joq, 12 ınfektsııa boıynsha kórsetkishtiń tómendegeni baıqalady. Ýaqytyly júrgizilgen aldyn alý is-sharalardyń nátıjesinde respýblıkanyń endemııalyq óńirlerinde aǵymdaǵy jyly halyqtyń asa qaýipti ınfektsııalarmen, onyń ishinde Kongo-qyrym qandy bezgegimen syrqattanýynyń tómendegeni baıqalady», - delingen basasóz habarlamasynda.
Vedomstvonyń atap ótýinshe, balalarǵa polıomıelıtke qarsy qosymsha ekpe jasaý boıynsha júrgizilgen jumys respýblıka aýmaǵynda polıomıelıttiń taralýynyń aldyn alýǵa múmkindik berdi.
Batys Qazaqstan oblysynda sý tasqyny kezinde sanıtarlyq-epıdemıologııalyq jaǵdaıdyń shıelenisýine jol berilgen joq.
Reseı men Belarýstyń sanıtarlyq-epıdemıologııalyq qyzmetiniń mamandarymen birlesip, Keden odaǵy sheńberinde jumystar júrgizilýde. Búgingi tańda Keden odaǵynyń sanıtarlyq sharalar boıynsha biryńǵaı normatıvtik-quqyqtyq bazasy ázirlendi jáne tolyq qalyptasty. Aǵymdaǵy jylǵy qańtardan bastap 26 mamyr aralyǵynda Komıtet jáne onyń aýmaqtyq departamentteri Qazaqstanǵa keletin ónimder men taýarlarǵa memlekettik tirkeý týraly 10 myńnan astam kýálik berdi.
QR Densaýlyq saqtaý mınıstri S.Qaıyrbekovanyń tapsyrmasy boıynsha Komıtet jáne onyń aýmaqtyq bólimsheleri sanıtarlyq-epıdemıologııalyq qyzmet organdary men uıymdarynda sybaılas jemqorlyqtyń aldyn alý jáne oǵan qarsy kúres boıynsha naqty sharalardy iske asyrýda.
Alqa májilisiniń qorytyndysy boıynsha Komıtet tóraǵasy - QR Bas sanıtarlyq dárigeri K.Ospanov ekinshi jarty jyldyqta qyzmettiń aldynda turǵan mindetterdi aıqyndady. Onda sybaılas jemqorlyqtyń aldyn alý, zańsyz tekserýler júrgizýge árbir memlekettik qyzmetshiniń jeke jaýapkershiligi, asa qaýipti jáne basqa da ınfektsııalyq aýrýlar oshaqtarynda epıdemııaǵa qarsy is-sharalardy kúsheıtý boıynsha kásipkerlik sýbektilermen ózara is-qımyl jasaý, balalardy pnevmokokk ınfektsııasyna qarsy vaktsınatsııalaýdy odan ári engizý, sondaı-aq sanıtarııalyq-epıdemıologııalyq qyzmettiń BMSK uıymdarymen halyqty sanıtarlyq aǵartý máseleleri boıynsha yqpaldastyǵy máselelerine basa mán beriledi.
Alqa májilisiniń jumysyna oblystardyń, Astana men Almaty qalalarynyń sanıtarııalyq-epıdemıologııalyq qyzmet organdary men uıymdarynyń, respýblıkalyq ǵylymı ortalyqtardyń, obaǵa qarsy kúres jáne dezınfektsııalaý stansalarynyń basshylary qatysty.
