Elimizde sanavıatsııa qyzmetine jyl saıyn 3 myńnan astam adam júginedi

ALMATY. QazAqparat – Medıtsınalyq avıatsııa qyzmeti kún saıyn 3-ten 15-ke deıin reıs jasaıdy. Bul týraly óńirlik kommýnıkatsııalar qyzmetiniń brıfınginde Densaýlyq saqtaý mınıstrligi «Jedel medıtsına ulttyq úılestirý ortalyǵynyń» basqarma tóraǵasy Arman Baıanbaev aıtty, dep habarlaıdy QazAqparat tilshisi.

«Medıtsınalyq avıatsııa respýblıka boıynsha orta eseppen táýligine 3-ten 15-ke deıin reıster jasaıdy. Reısterdiń eń kóp úlesi jaraqattaný, onyń ishinde jol apattary saldarynan bolǵan, sondaı-aq balalar arasyndaǵy patologııa jaǵdaılary, qan aınalym júıesi aýrýlary, jańa týǵan nárestelerdiń patologııasy, akýsherlik, gınekologııalyq, hırýrgııalyq, terapevtik patologııalar, basqa da aýrýlar kezinde medıtsınalyq kómek kórsetý maqsatynda júzege asady», - dedi Arman Baıanbaev.

El turǵyndaryna sanıtarlyq avıatsııa arqyly shuǵyl túrde jedel medıtsınalyq kómek kórsetý 2011 jyldyń sáýirinen bastap júzege asyrylyp keledi. Jyl saıyn bul qyzmetke úsh myńnan astam adam júginedi. Spıker aqparatyna sáıkes, búgingi kúni medıtsınalyq avıatsııanyń 33 áýe kemesi bar, onyń ishinde 20 ushaq jáne 13 tikushaq paıdalanylady.

«Barlyq paıdalanylatyn áýe kemeleriniń QR Azamattyq avıatsııa komıtetinen sertıfıkaty bar. Osy qyzmettiń negizi qalanǵannan beri, ıaǵnı 2011 jyldan bastap, bıylǵy qazan aıyna deıingi kezeńde oryndalǵan ushýlar sany – 22 665. Donorlyq aǵzalardy alý jáne tasymaldaý úshin 78 reıs jasaldy. Shetelde aýyr halde jatqan QR azamattary men qandastardy elimizdiń emhanalaryna jetkizý maqsatynda álemniń 25 eline 107 sheteldik reıs jasaldy», - dedi spıker.

Sonymen qatar, Arman Baıanbaev el azamattaryna medıtsınalyq avıatsııa túrinde shuǵyl kómek kórsetý – tegin medıtsınalyq kómektiń kepildik berilgen kólemi aıasynda júzege asatynyn atap ótti.