Elimizde salynyp jatqan álemdik deńgeıli kolledjder janynan arnaıy mektepter ashylady
ASTANA. QazAqparat - Elimizde salynyp jatqan álemdik deńgeıli kolledjder janynan arnaıy mektepter ashylady. Búgin bul týraly QR Prezıdenti janyndaǵy Ortalyq kommýnıkatsııalar qyzmetinde ótken brıfıngte málim boldy. Eske salaıyq, brıfıng barysynda tehnıkalyq jáne kásibı dýaldyq oqytý máseleleri talqylanǵan bolatyn.
Onyń barysynda «Kásipqor» holdıngi» UAQ basqarmasynyń tóraıymy Eldana Sádýaqasova Astana men Almaty qalalarynda salynyp jatqan álemdik deńgeıdegi kolledjderge, óńirlik ortalyqtar qyzmetine toqtalyp ótti. Onyń aıtýynsha, álemdik deńgeıdegi kolledjder kópdeńgeıli ári olardyń janynan arnaıy mektepter salynady.
«Mundaı mektepter basym jaǵdaıda týrızm, qonaq úı isteri, qurylys jáne turǵyn úı-kommýnaldyq sharýashylyq, ınjenerlik-kommýnıkatsııalyq tehnologııalar, energetıka, dızaın baǵyttaryna negizdelmek. Mektepterdiń árqaısysy úshin biz basty áriptesterdi de tańdap aldyq. Olardy aıqyndaýda álemniń 54 oqý mekemeleri qatysqan aýqymdy konkýrs uıymdastyrylyp, 6 áriptesti anyqtap aldyq», - deıdi E. Sádýaqasova.
Onyń aıtýynsha, 4 óńiraralyq ortalyq negizinen monosalalardy qamtýymen erekshelenedi. Máselen, Atyraýdaǵy ortalyqta munaı jáne gaz salasyna basymdyq berilse, Óskemende mashına qurylysyna, Ekibastuzda - energetıka, al Shymkenttegi óńirlik ortalyqta - azyq-túlik jáne jeńil ónerkásipke basymdyq beriledi.
