Elimizde salynatyn gaz óńdeý zaýyty 2028 jyly paıdalanýǵa berilýi múmkin

ASTANA. QazAqparat – «Qarashyǵanaq Petroleým Opereıtıng» salatyn gaz óńdeý zaýyty kestege saı 2030 jyly paıdalanýǵa berilýi tıis. Degenmen, onyń qurylysyn 2028 jyly aıaqtaý múmkindigi qarastyrylyp jatyr. Bul týraly «Іri munaı-gaz jáne munaı-gaz hımııasy jobalaryn damytýdyń 2023-2027 jyldarǵa arnalǵan keshendi josparynda» jazylǵan, dep habarlaıdy QazAqparat tilshisi.

«Qazaqstan gaz qory boıynsha álemde 22-shi jáne TMD elderi arasynda Reseı men Túrikmenstannan keıin 3-orynda. Alynatyn qorlar 3,8 trln m3, onyń ishinde ilespe gaz – 2,2 trln m3, bos gaz – 1,6 trln m3. Barlanǵan gaz qorlarynyń shamamen 98%-y Qazaqstannyń batysynda. Óziniń qurylymy boıynsha respýblıkada óndiriletin gaz – negizinen ilespe munaı gazy. Qazaqstanda gaz óndirýdiń shamamen 80%-yn Qarashyǵanaq, Qashaǵan, Teńiz jáne Jańajol jobalary qamtamasyz etedi», - delingen «Ashyq» NQA portalynda jarııalanǵan Úkimet qaýlysynyń jobasynda.

Keshendi josparda kórsetilgendeı, byltyr Qazaqstanda 53,2 mlrd tekshe metr ilespe gaz óndirilgen.

«Gazdyń boljamdy balansyna sáıkes, 2030 jylǵa qaraı ilespe gazdy óndirý kólemi 87,1 mlrd m3 bolady. Qazaqstan ekonomıkasynyń damýyna qaraı ishki naryqtyń gazǵa degen qajettiligi únemi artyp keledi. Jańa tutynýshylar sanynyń artýyn gazben qamtamasyz etýmen qatar, elektr energııasy jobalaryn, munaı-hımııa salasyndaǵy jańa ınvestıtsııalyq jobalardy gazben qamtamasyz etý jáne ónerkásiptik kásiporyndardy gazǵa aýystyrý qajettiligi de bar. Energetıkalyq qaýipsizdikti saqtaý jáne gaz salasyn odan ári turaqty damytý úshin resýrstyq bazany keńeıtý qajet», - dep jazylǵan keshendi josparda.

Bul rette «Qarashyǵanaq Petroleým Opereıtıng» salatyn gaz óńdeý zaýyty kestege saı 2030 jyly paıdalanýǵa berilýi tıis. Degenmen, kópshilk talqylaýǵa shyǵarylǵan qujatta onyń qurylysyn 2028 jyly aıaqtaý múmkindigi qarastyrylyp jatqany jazylǵan. Bul eldegi gaz óńdeý kólemin arttyrýǵa múmkindik bermek.