Elimizde saqtandyrý ombýdsmeniniń róli kúsheıtiledi
«Zańda saqtandyrý ombýdsmanynyń saqtandyrý uıymymen klıentterdiń kelispeýshilikterin mindetti túrde sotqa deıingi retteýdi engizýi kózdelgen. Bul norma 2024 jyldan bastap engiziledi. Klıentter eń aldymen saqtandyrý ombýdsmenine, sodan keıin saqtandyrý ombýdsmeni saqtandyrý kompanııasymen máseleni sheshpese, sotqa júginýge mindetti bolady. Ombýdsmen shyǵarǵan sheshimderdi saqtandyrý uıymdary oryndaýǵa mindetti. Muny agenttik qadaǵalaıdy», - dedi QR Qarjy naryǵyn retteý jáne damytý agenttigi tóraǵasynyń orynbasary Marııa Hadjıeva Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, saqtandyrý ombýdsmeni Qazaqstanda 2008 jyldan bastap jumys isteıdi. Saqtandyrý ombýdsmeni – óz qyzmetinde táýelsiz tulǵa, onyń negizgi qyzmeti – saqtandyrý uıymdary men olardyń klıentteri arasynda jasalǵan saqtandyrý sharttary boıynsha daýlardy sottan tys sheshý.
Saqtandyrý uıymynyń klıenti úshin saqtandyrý ombýdsmany tegin qyzmet kórsetedi. Saqtandyrý ombýdsmeni qaraýǵa quqyly daýlar boıynsha talaptar somasy 10 000 AEK-ten aspaýǵa tıis (2022 jylǵy jaǵdaı boıynsha shamamen 31 mln teńge).
Kóp jaǵdaıda saqtandyrý ombýdsmanyna saqtandyrý tóleminiń mólsherine, kólik quralyna keltirilgen zııannyń mólsherin baǵalaýǵa, tólemdi júzege asyrýdan bas tartýǵa jáne t. b. baılanysty kólik quraldary ıeleriniń azamattyq-quqyqtyq jaýapkershiligin mindetti saqtandyrý sheńberindegi daýlar boıynsha júginedi.
Sonymen qatar saqtandyrý ombýdsmeni saqtandyrýdyń barlyq túrleri boıynsha kelispeýshilikterdi retteıdi, munda jeke tulǵalar nemese shaǵyn kásipkerlik sýbektileri saqtanýshy retinde áreket etedi. Ózge zańdy tulǵalar saqtandyrý ombýdsmenine kólik quraldary ıeleriniń azamattyq-quqyqtyq jaýapkershiligin mindetti saqtandyrý boıynsha ǵana júgine alady.
